උපුල් වික්‍රමසිංහ
පසුගියදා පැවැති පාර්ලිමේන්තු මැතිවරණයේදී ජාතික ජන බලවේගය ඡන්ද 80,830 (සියයට 24.85) ක් හා ආසන 3 ක් ලබා ගනිමින් යාපනය දිස්ත්‍රික්කය ජයග්‍රහණය කිරීම මෙරට පාර්ලිමේන්තු මැතිවරණ ඉතිහාසයේ දකුණේ දේශපාලන පක්ෂයක් යාපනය දිස්ත්‍රික්කය ජය ගත් පළමු අවස්ථාව වශයෙන් ඉතිහාසගත විය.
ඒ අනුව 2004 සිට පැවති මහ මැතිවරණ ගණනාවකදී ඉලංකෙයි තමිල් අරසු කච්චි පක්ෂය විසින් ජයග්‍රහණය කරනු ලැබූ යාපනය දිස්ත්‍රික්කය මෙවර ජාතික ජන බලවේගය ජයග්‍රහණය කළේ වැඩි ඡන්ද 17,503 ක් ලබා ගනිමිනි. ඡන්ද 63,327 ක් ලබා ගනිමින් මෙවර යාපනය දිස්ත්‍රික්කයේ දෙවැනි තැනට පත් වූ ඉලංකෙයි තමිල් අරසු කච්චි පක්ෂයට හිමි වූ ආසන ගණන එකකි. සමස්ත ලංකා දෙමළ කොංග්‍රසය සහ ස්වාධීන කණ්ඩායම් අංක17 ආසන එක බැගින් දිනා ගත්තේය.

අවසන් වතාවට 2020 දී පැවැති මහ මැතිවරණයේදී ඡන්ද 112,967 (සියයට 31.46) ක් ලබාගනිමින් යාපනය දිස්ත්‍රික්කය ජයග්‍රහණය කළ ඉලංකෙයි තමිල් අරසු කච්චි පක්ෂයට හිමි වූ ආසන ගණන 3 කි. 2015 පාර්ලිමේන්තු මැතිවරණයේදී එම පක්ෂය යාපනය දිස්ත්‍රික්කය ජය ගත්තේ ඡන්ද 207,577 (සියයට 69.12) ක් ලබා ගනිමිනි. හිමි වූ ආසන ප්‍රමාණය 5 කි.
මේ අතර 2010 දී පැවැති මහ මැතිවරණයේදී ද ඉලංකෙයි තමිල් අරසු කච්චි පක්ෂය යාපනය දිස්ත්‍රික්කය ජය ගත් අතර එම පක්ෂයට හිමි වූ ඡන්ද ප්‍රමාණය 65,119 (සියයට 43.85) කි. හිමි වූ ආසන සංඛ්‍යාව 5 කි. 2004 පාර්ලිමේන්තු මැතිවරණයේදී ද යාපනය දිස්ත්‍රික්කයේ ජය තහවුරු කර ගැනීමට එම පක්ෂය සමත් වූ අතර එහිදී හිමි වූ ඡන්ද ප්‍රමාණය 257,320 (සියයට 90.60) කි. ලබා ගත් ආසන ප්‍රමාණය 8 කි.