- කමිටුව පත්කිරීම 8 වැනිදා
- යෝජනාවට පක්ෂව බහුතරයක්
සුජිත් හේවාජුලිගේ
පොලිස්පති දේශබන්දු තෙන්නකෝන් එම ධුරයෙන් නෙරපීමේ යෝජනාව විවාදයට ගැනීම බොහෝ දුරට සිංහල අවුරුද්දෙන් පසු දිනයක සිදුවනු ඇතැයි පාර්ලිමේන්තු ආරංචි මාර්ගවලින් පැවසේ.
ධුරයෙන් පහ කිරීමේ යෝජනාව සම්මත කිරීමට පෙර පොලිස්පතිවරයාට එරෙහි චෝදනා සම්බන්ධයෙන් විමර්ශන කිරීමට ත්‍රිපුද්ගල කමිටුව පත්කිරීමේ යෝජනාව ලබන 8 වැනිදා පාර්ලිමේන්තුවට ඉදිරිපත් කිරීමට නියමිතය. එම යෝජනාව පාර්ලිමේන්තුවේ අලු‍ත්ම න්‍යාය පුස්තකයට දැනටමත් ඇතුළත් කරනු ලැබ ඇත. ස්ථාවර නියෝග අනුව කමිටුව පත් කිරීමේ යෝජනාව පාර්ලිමේන්තුවේ ඡන්ද 113කින් සම්මත කළ යුතුව ඇත.
අගවිනිසුරුවරයා පත් කරන විනිසුරුවරයෙක්, ජාතික පොලිස් කොමිෂන් සභාවේ සභාපතිවරයා සහ අගමැති සහ විපක්ෂ නායක යන දෙදෙනාගේ එකඟත්වයෙන් පත් කෙරෙන නියෝජිතයෙක් මෙම කමිටුවට ඇතුළත් වෙති. ත්‍රිපුද්ගල කමිටුව ලබන 8 වැනිදා පත් කිරීමෙන් අනතුරුව දේශබන්දු තෙන්නකෝන්ට එරෙහි චෝදනා විමර්ශනය කිරීමට එම කමිටුවට යම් කාලයක් ගතවනු ඇත. දේශබන්දු තෙන්නකෝන් ධුරයෙන් පහ කිරීමේ යෝජනාව සභාවට ඉදිරිපත් කෙරෙන්නේ එම කමිටුවේ වාර්තාව කථානායකවරයාට භාරදීමෙන් අනතුරුවය.
පාස්කු ඉරු දින ප්‍රහාරය සම්බන්ධයෙන් මැල්කම් කාදිනල් රංජිත් කොළඹ අගරදගුරුතුමා ඇතුළු පාර්ශ්වකරුවන් නව දෙනෙකු ඉදිරිපත් කළ පෙත්සම් සලකා බැලීමෙන් පසු ශ්‍රේෂ්ඨාධිකරණය පොලිස්පති දේශබන්දු තෙන්නකෝන්ගේ සේවා කටයුතු අත්හිටුවමින් පසුගිය වසරේ ජූලි මස 24 වැනිදා නියෝගයක් නිකුත් කළේය.
මාතර ප්‍රදේශයේ සිදුවූ වෙඩි තැබීමේ සිද්ධියක් සම්බන්ධයෙන් දේශබන්දු තෙන්නකෝන් මහතා ලබන මස 3 වැනිදා දක්වා රිමාන්ඩ් බන්ධනාගාර ගත කරනු ලැබ සිටී. ඔහු රඳවා සිටින්නේ මහනුවර දුම්බර බන්ධනාගාරයේය.
පොලිස්පති දේශබන්දු තෙන්නකෝන් සේවයෙන් පහ කිරීමේ යෝජනාව ආණ්ඩුවේ මන්ත්‍රීවරුන් 115 දෙනෙකුගේ අත්සනින් යුතුව කථානායක, වෛද්‍ය ජගත් වික්‍රමරත්නට පසුගිය දා භාරදෙනු ලැබීය.
විෂමාචාර සහ දූෂණ ධුරයේ බලතල අනිසි ලෙස පාවිච්චි කිරීම, රාජකාරිය පැහැර හැරීම සහ පක්ෂග්‍රාහීව කටයුතු කිරීම යන චෝදනා හතර පදනම් කරගෙන මෙම යෝජනාව ඉදිරිපත් කර ඇත.
මෙම යෝජනාවට සහාය පළ කිරීමට සමගි ජන බලවේගය දැනටමත් තීරණය කර ඇත. මේ අනුව එම යෝජනාව සම්මත කිරීමට අවශ්‍ය බහුතරය ස්ථීරයෙන්ම ලැබෙන බව පාර්ලිමේන්තු ආරංචි මාර්ග සඳහන් කළේය.
