- මහාචාර්ය රොහාන් සමරජීව
උපුල් වික්‍රමසිංහ
මාර්ගගත ක්‍රමවල සුරක්ෂිතතාව පිළිබඳ පනතෙන් අන්තර්ජාලය භාවිත කරමින් සිදු කරන වැරදි හා ඒවාට ලබා දෙන දඬුවම් පැහැදිලිව දක්වා තිබියදී පාර්ලිමේන්තුවට ඉදිරිපත් කර ඇති 1991 අංක 25 දරන ශ්‍රී ලංකා විදුලි සංදේශ (සංශෝධන) පනත් කෙටුම්පතේ 59 (අ) වගන්තියෙන් දුරකථනයක් භාවිතයෙන් මහජන කැලඹීමක් ඇති කිරීමේ හෝ මහජන සාමය කඩ කිරීමේ අදහස ඇතිව ඇමතුම් ලබා ගැනීම, පණිවුඩ යැවීම වරදක් ලෙස නැවතත් දක්වා තිබීම ප්‍රශ්නකාරී යැයි විදුලි සංදේශ නියාමන අධිකාරියේ හිටපු අධ්‍යක්ෂ ජනරාල් මහාචාර්ය රොහාන් සමරජීව මහතා ඉරිදා ලංකාදීපයට පැවසීය.
පනත් කෙටුම්පතෙහි 59 ආ අනුවගන්තියෙන් දැනුම්වත්ව යම් වරදක් සිදු කිරීමට අදාළව අසත්‍ය තොරතුරු ලබා දීම ද වරදක් ලෙස දක්වා ඇතැයි කී මහාචාර්යවරයා එවැන්නක් විදුලි සංදේශ පනතකට අදාළ වන්නේ කෙසේ දැයි තමා ප්‍රශ්න කරන බව ද සඳහන් කළේය.පනතෙහි අදාළ වගන්ති අප පරිශීලනය කළ අතර ඒ අනුව 59අ අනු වගන්තියෙහි සඳහන් වරදක් කරන අයෙකුට රුපියල් මිලියනයකට නොවැඩි දඩයක් හෝ මාස තුනකට නොවැඩි කාලයකට බන්ධනාගාරගත කිරීමකට හෝ එම දඬුවම් දෙකටම හෝ යටත් විය හැකිය යනුවෙන් දැක්වේ. එම අනුවගන්තිය පහත පරිදිය.
“මහජන කැලඹීම ඇති කිරීමේ හෝ මහජන සාමය කඩකිරීමේ අදහස ඇතිව දුරකතනයක් භාවිතයෙන් සිතාමතාම දුරකතන ඇමතුමක් ලබා ගන්නා හෝ පණිවුඩ යවන හෝ සම්ප්‍රේෂණය කරන සෑම තැනැත්තකුම වරදක් සිදු කරන අතර වරදකරු කරනු ලැබීමේදී රුපියල් මිලියනයකට නොවැඩි දඩයකට හෝ මාස තුනකට නොවැඩි කාලසීමාවක් සඳහා දෙයාකාරයෙන් එක් ආකාරයක බන්ධනාගාරගත කිරීමකට හෝ එකී දඩය සහ බන්ධනාගාරගත කිරීම යන දඬුවම් දෙකටම ද වරද අඛණ්ඩව සිදු කරගෙන යනු ලබන අවස්ථාවක එසේ වරද සිදු කරනු ලබන එක් එක් දිනය සඳහා රු.1500 බැගින් වූ දඩයකට හෝ මාස හයකට නොවැඩි කාලසීමාවක් සඳහා දෙයාකාරයෙන් එක් ආකාරයක බන්ධනාගාරගත කිරීමකට හෝ
එකී දඩය සහ බන්ධනාගාරගත කිරීම යන දඬුවම් දෙකටම ද යටත් විය යුතුය”.
කුප්‍රකට සිල් රෙදි නඩුව විදුලි සංදේශ නියාමන කොමිසම සතු මුදල් දේශපාලන ප්‍රචාරක ව්‍යාපෘතිවලට යොදා ගැනීම සම්බන්ධයෙන් දැක්විය හැකි මෑතකාලීන උදාහරණයක් බව කී සමරජීව මහතා විදුලි සංදේශ කටයුතුවලට වෙන් කළ මුදල් දේශපාලන වැඩසටහන් සඳහා යොදා ගැනීම වළක්වන ආකාරයේ ප්‍රතිපාදන මේ පනත් කෙටුම්පතට ඇතුළත් කරනු ඇතැයි අපේක්ෂා කළ ද එවැන්නක් ඇතුළත් කර නැති බව ද ප්‍රකාශ කළේය.
