(ඉන්දිකා රාමනායක)
මාදම්පිටිය සුසානභූමිය තුළදී පුද්ගලයින් දෙදෙනකු කපා කොටා ඝාතනය කිරීමේ සිද්ධියට සම්බන්ධ පාතාල සාමාජිකයින් 5 දෙනකු වත්තල හුණුපිටිය පොහොර සංස්ථාවේ ගබඩාව ආසන්න මාර්ගයේදී අද පොලිස් විශේෂ කාර්ය බලකායේ බුද්ධි කොට්ඨාසයේ නිලධාරීන් කණ්ඩායමක් විසින් අත්අඩංගුවට ගෙන තිබේ.
මොවුන් පස් දෙනා මෙම ඝාතන සිද්ධියට සෘජුව සම්බන්ධ පුද්ගලයින් බවත් වෙනත් ප්‍රදේශයකට පළා යාම සදහා ත්‍රිරෝද රියකින් ගමන් කරමින් සිටියදී මෙලෙස අත්අඩංගුවට ගෙන ඇති බවත් පොලිස් විශේෂ කාර්ය බලකාය සඳහන් කරයි.
ඝාතනයට යොදාගත් මන්නා පිහි ඇතුළු තියුණු ආයුධ කැලණිය කළුපාලමෙන් කැලණි ගඟට විසි කළ බව සැකකරුවන් පාපොච්චාරණය කර තිබේ.
මොවුන් සමඟ මෙම ඝාතන සිද්ධිය සම්බන්ධයෙන් මේ වන විට පුද්ගලයින් 8 දෙනකු අත්අඩංගුවට ගෙන තිබේ.
