(අංජුල මහික වීරරත්න)
රට විනාශයට පත්කිරීමට නොව රට ගොඩ දැමීමට සියල්ලන්ම එකතුවිය යුතු බව එක්සත් ජාතික පක්ෂයේ සභාපති හා පාර්ලිමේන්තු මන්ත්‍රී වජිර අබේවර්ධන මහතා පැවසීය.
මෙි රට ගොඩ නැගීමට සියල්ලන්ගේ සහයෝගය අවශ්‍ය කාලයක් බැවින් ඒ සඳහා පක්ෂ පාට භේද නොසලකා සියලුදෙනා එක්විය යුතු බව ද වජිර අබේවර්ධන මහතා කීය.
‘’සිරිකොත” එක්සත් ජාතික පක්ෂ මූලස්ථානයේ අද (01) පැවැති මාධ්‍ය හමුවට එක්වෙමින් වජිර අබේවර්ධන මහතා මේ බව සඳහන් කළේය.
නිදහසින් පසු රට ගොඩනැගීම වෙනුවට පටු අරමුණු සාක්ෂාත් කරගැනීමට විවිධ දේශපාලන පක්ෂ හා නායකයන් කටයුතු කිරීම හේතුවෙන් අරාජික තත්වයට ඇදවැටී තිබෙන බවද එජාප සභාපතිවරයා කීය.
අරගලය නමින් නැවතත් විරෝධතා ව්‍යාපාරයන් හි නිරතවීමට උත්සාහ කරන අතර වර්ධනය වෙමින් පවතින සංචාරක කර්මාන්තය එයින් කඩා වැටෙන්න හැකියාව ඇති බවත් ඩොලර් අර්බූදයක් ඇතිවී ඉන්ධන හා ගෑස් හිඟයක් මතු විය හැකි බවත් වජිර අබෙිවර්ධන මහතා සඳහන් කළේය.
අරගලය වැනි විරෝධතා ව්‍යාපාර අදහස් ප්‍රකාශ කිරීමේ අයිතියක් බවට සමහරුන් තර්ක කරන බවත් ජනතාවට අදහස් ප්‍රකාශ කිරීමේ අයිතිය ආණ්ඩුක්‍රම ව්‍යවස්ථාවේ ද සඳහන් කර තිබෙන බවත් අබෙිවර්ධන මහතා කීය. එහෙත් අදහස් ප්‍රකාශ කිරීමෙි අයිතිය වල්බූරු නිදහසක් නොවිය යුතු අතර සිංගප්පුරුව, ජපානය වැනි රටවලට එම මුලික අයිතිවාසිකම් සම්බන්ධයෙන් ඇතැම් සීමා පනවලා තිබෙන්නේ යැයිද ඒ මගින් එම රටවල් සංවර්ධනය වී තිබෙන බවද වජිර අබෙිවර්ධන මහතා වැඩිදුරටත් සඳහන් කළේය.
