(නිමල කොඩිතුවක්කු)
මහින්ද රාජපක්ෂ මහතා නව අග‍්‍රාමාත්‍යවරයා ලෙස පිළිගෙන ඇති කථානායක කරූ ජයසූරිය මහතාට නව ආණ්ඩුව ප්රතික්ෂේප කළ නොහැකි බව ජාතික ඒකාබද්ධතා සංහිදියා හා රාජ්‍ය භාෂා අමාත්‍ය වාසුදේව නානායක්කාර මහතා කොළඹදී අද (05) පැවසීය.
තමන් ඇතුලූ පිරිසට පාර්ලිමේන්තුවේ ආණ්ඩු පක්ෂයේ අසුන් පැනවීමට කතානායකවරයා විසින් නියම කර ඇතැයිද අමාත්‍යවරයා සදහන් කළේය.
සමාජවාදී ජනතා පෙරමුණ බොරුල්ල ඇන්. ඇම් පෙරේරා කේන්දු‍්‍රයේ පැවැත්වූ මාධ්‍ය හමුවකට එක්වෙමින් ඒ මහතා මේ බව පැවසීය.
එහිදී වැඩිදුරටත් අදහස් දැක්වූ අමාත්‍ය වාසුදේව නානායක්කාර මහතා මෙසේද කීය.
‘‘දැනට අරලියගහ මැදුරේ නීති විරෝධිව රැදි සිටින රනිල් වික‍්‍රමසිංහ මහතා ඇතුලූ පිරිසට එසේ සිටිමට ඉඩකඩ දී තිබෙන්නේ අපේ නිතිය අසරණ වී තිබෙන නිසා නෙමෙයි. හදිස්සියේ එතුමා පිට කිරීම ඒ තරම්ම චාරිත‍්‍රානුකූල නොවන නිසයි.
මේ වෙච්ච බල පෙරලිය ජනතා බලයේ මහිමයෙන් සිදුවූ දෙයක්. මේක හදිස්සියේ සිදුවුවාට කාළයක් තිස්සේ සිදුවූ සිද්ධි දාමයක් වනවා. පෙබරවාරි 10 පැවති පළාත් පාළන ඡුන්දයෙන් හිමිවූ ජනවරමත් එක්ක මේක ආරම්භ වුනා.
මේක ව්‍යවස්ථානුකූලද නීත්‍යානුකූලද කියලා එක්සත් ජාතික පක්ෂය විමසිමක් කරනවා. එක්සත් ජාතික පක්සයේ ප‍්‍රකාශයට අනුව එය අපිට තීන්දු කරන්න බැහැ. මේක තීන්දු කරන්න පුලූවන් එක්කො අධිකරණයටයි.
අනික් පැත්තෙන් මුලූ රාජ්‍ය යන්ත‍්‍රණයම මේ අලූත් ආන්ඩුවේ උපදෙස් අනුව කටයුතු කරමින් සිටිනවා. මෙතනදි ඒකත් එක පරීක්ෂණයක් වනවා.
නීත්‍යානුකූල භාවය පිලිගන්න නිසා තමයි රාජ්‍ය යන්ත‍්‍රණයේ අනුකූලත්වය ලැබී තිබෙන්නේ. ඒක පිලිගන්නේ නැත්නම් අධිකරණයකට යා යුතුයි.
මේ රජය ජනාධිපතිවරණයත් මහ මැතිවරනයත් යන දෙකම නොපවත්වා කල් දැමීමේ උපක‍්‍රමයක් රනිල් වික‍්‍රමසිංහ ආන්ඩුව කටයුතු කරමින් සිටි බවට අපිට තොරතුරු ලැබී තිබුණා. මේ අයට ඡුන්දයකට මුහුණ දෙන්න විදියක් නැහැ. ඒ නිසා ඡුන්ද නොපවත්වන ආන්ඩුවක් කොහොමද හදාගන්නේ කියන එක වික‍්‍රමසිංහ මහතාගේ ඊළඟ වුවමනාව වී තිබුණා.
ජනාධිපති ඝාතන සැළැස්ම මගින් ඔහු තනි බලයක් ඔහුගේ අතට ගැනීමට සැළසුම් කළාය කියන සැකය අනික් අතට තියෙනවා. මේ අවදානම් තත්වයන් මගඇරවා ගැනිමට අවශ්‍ය නිසා ජනාධිපතිවරයා තීන්දු කලා ව්‍යවස්තානුකූලව රනිල් වික‍්‍රමසිංහ මහතාගේ බලය නැති කරන්න. ඒ මගින් මේ රටේ අතිවෙන්න ගිය අවධානමක් නැති කරලා තියෙනවා.
රනිල් වික‍්‍රමසිංහ මහතාගේ සැළසුම් තවදුරටත් මේ රටේ ක‍්‍රියාත්මක වුනොත් මේ රටටත් පොදු ජනතාවටත් විශාල අහේනියකට සහ අවාසනාවකට මුහුන දෙන්න වෙනවා. ඔහු බලාපොරොත්තු වූ පිම්ම පනින්න අපි ඉඩ ලබාදුන්නේ නැහැ. කොළඹට රැස් වෙන ලක්ෂ සංඛ්‍යාත ජනතාව ඒකට සාක්ෂි දරාවි’’ යැයිද වාසුදේව නානායක්කාර මහතා එහිදී පැවසිය.
ඡායාරූප හා වීඩියෝ - රොමේෂ් ධනුෂ්ක සිල්වා
