උසස් පෙළ පිළිතුරු පත්‍ර ඇගයීමේ කටයුතු සඳහා සහභාගි නොවුණොත් අදාළ පාර්ශ්වයන්ට එරෙහිව නීතිමය පියවර ගැනීමට අපේක්ෂා කරන බව ජනාධිපති රනිල් වික්‍රමසිංහ මහතා නොබෝදා කියා සිටියේය. ඒ සම්බන්ධයෙන් නීතිපතිවරයා සමඟද සාකච්ඡා කරන බවද ජනාධිපතිවරයා සඳහන් කළේය. අධ්‍යාපන හා උසස් අධ්‍යාපන, කම්කරු සහ විදේශ රැකියා අමාත්‍යංශවල විශේෂ අයවැය යෝජනාවල ප්‍රගතිය සමාලෝචනය වෙනුවෙන් පැවති සාකච්ඡාවේදී ජනාධිපතිවරයා මේ ප්‍රකාශය කළේය.
උසස් පෙළ පිළිතුරු පත්‍ර ඇගයීම සම්බන්ධයෙන් විකල්ප යෝජනා සහ විසඳුම් ඇතුළත් නිශ්චිත වැඩපිළිවෙළක් ඉදිරිපත් කරන ලෙසටද අධ්‍යාපන බලධාරීන්ට උපදෙස් දී තිබූ ජනාධිපතිවරයා විභාග සම්බන්ධ කාර්යයන් අත්‍යවශ්‍ය සේවාවක් ලෙස නම් කිරීමට අවශ්‍ය පියවර ගන්නා බවද සඳහන් කර තිබිණි.
එසේම විභාග කටයුතු හදිසි සේවාවක් ලෙස පවත්වාගෙන යාමට අවශ්‍ය නීති සම්පාදනය කිරීමට අපේක්ෂා කරන බවද ප්‍රකාශ කර තිබේ.
මේ රටේ උසස් පෙළ විභාගය යනු වසර දෙකක මැරතන් තරගයකි. මේ තරගයේ දී ධාවකයන් වන්නෝ සිසුහු පමණක් නොවෙති. මාපියෝද තම සිසු දරුවන් සමඟ මේ මැරතන් එකේ දුවති.
උසස් පෙළ විභාගයේ තරගකාරී බව කොතරම්ද යත් ඇතැම් මාපියන්ට ඇතැම් විට හුස්මක් කටක් ගන්නටත් වෙලාවක් නැත. විභාගයට වෙහෙස වෙන දරුවන්ට සියලු අවශ්‍ය දේ සම්පාදනය කරදී මවුපියන් යන්තම් සැනසුම් සුසුමක් හෙළන්නේ විභාගය අවසන්වීමෙන් අනතුරුව ය. ඉන්පසුව ප්‍රතිඵල එනතුරු ඔවුන් ගත කරන්නේද දරුවන්ගේ ප්‍රතිඵල කෙසේ වනු ඇතිදැයි යන අවිනිශ්චිත බවේ ගිලෙමිනි. විභාගයට පෙනී සිටි සිසු දරුවන්ද ප්‍රතිඵල එනතුරු සිටින්නේ ඇඟිලි ගණිමිනි.
එසේ තිබියදී උසස් පෙළ පිළිතුරු පත්‍ර ඇගයීමේ කටයුතු ප්‍රමාද වනවිට මේ සිසු දරුවනුත් මාපියනුත් වැටෙන්නේ අලි අමාරුවක ය. ඔවුහු මානසික කඩා වැටීමකට ද ලක්වෙති. විභාගය ලියන සියලු‍දෙනා එය සමත්වන්නේ නැත. අසමත් වන සහ සමත් වුණත් පවතින දැඩි තරගකාරී බව හේතුවෙන් සරසවි වරම් අහිමි විය හැකි සිසුන්ට ඊළඟ වසරේ විභාගයට සූදානම් වීමට ප්‍රමාණවත් කාලයක් තිබිය යුතු ය. එහෙත් දැන් සිදුවන පිළිතුරු පත්‍ර ඇගයීම් ප්‍රමාදවීම හේතුවෙන් එසේ ප්‍රමාණවත් කාලයක් ඔවුන්ට ලැබෙන්නේ නැත. එය සිසුන්ට පමණක් නොව මාපියන්ටද හිසරදයකි.
විශ්වවිද්‍යාල ආචාර්යවරුන් උසස් පෙළ සිසුන්ගේ පිළිතුරු පත්‍ර නොබැලීමෙන් අසාධාරණයක් සිදුවන බව පවසමින් මවුපියන් පිරිසක් මානව හිමිකම් කොමිසමට පැමිණිල්ලක් ඉදිරිපත් කර ඇත්තේ ද මේ හේතුවෙනි. පෞද්ගලික ප්‍රශ්න වෙනුවෙන් දරුවන් ප්‍රාණ ඇපයට නොගන්නා ලෙසටද මවුපියෝ කියා සිටිති.
විශ්වවිද්‍යාල ආචාර්යවරුන් මේ ක්‍රියාමාර්ගය ගැනීමට ඔවුන්ට සාධාරණ වූ හේතු තිබෙන බවද අපි පිළිගනිමු. එහෙත් තමන්ගේ වෘත්තීය ගැටලු විසඳා ගැනීම වෙනුවෙන් උසස් පෙළ සිසු දරුවන්ගේ අනාගතය ප්‍රාණ ඇපයට ගැනීමට ඔවුන්ට අයිතියක් නැත. විශ්වවිද්‍යාල ආචාර්යවරුන්ගේ සමිති සම්මේලනයේ මාධ්‍ය ප්‍රකාශක ජ්‍යෙෂ්ඨ කථිකාචාර්ය චාරුදත්ත ඉලංගසිංහ මහතා ප්‍රකාශ කර තිබුණේ වෘත්තිකයන්ගෙන් අය කරන අසාධාරණ බදු අයකර ගැනීමේ ක්‍රමය ලිහිල් කරන ලෙස ඉල්ලා සහ තවත් ඉල්ලීම් කිහිපයක් මුල්කර ගනිමින් සිදුකරන වෘත්තීය ක්‍රියාමාර්ගවලට අනුව උසස් පෙළ උත්තර පත්‍ර පරීක්ෂා කිරීමේ කටයුතුවලින් ආචාර්යවරුන් ඉවත් වී සිටින බවය.
මේ අනුව ඔවුන් කරන්නේ වෘත්තීය අරගලයක් බව පැහැදිලිය. එහෙත් අප පෙන්වා දෙන්නේ කුමන වෘත්තීය අරගලයකදී වුවද මෙරට ශිෂ්‍ය අයිතිවාසිකම් උල්ලංඝනය වන ආකාරයට කටයුතු කිරීම වැරදි බවය. උත්තර පත්‍ර පරීක්ෂාවේ ප්‍රමාදයෙන් අගතියට පත්වන උසස් පෙළ සිසුන්ට සහ ඔවුන්ගේ මාපියන්ට තමන්ගේ අයිතිවාසිකම් ගැන කතා කිරීමට මොනම සම්මේලනයක්වත් නැත. ජනාධිපතිවරයා විභාග සම්බන්ධ කාර්යයන් අත්‍යවශ්‍ය සේවාවක් ලෙස නම් කිරීමට අවශ්‍ය පියවර ගන්නා බව ප්‍රකාශ කළේ එම සිසුන් සහ මාපියන්ගේ අයිතිවාසිකම් වෙනුවෙනි.
අවසාන විග්‍රහයේදී කිව යුත්තේ උසස් පෙළ උත්තර පත්‍ර පරීක්ෂා කිරීම තවදුරටත් ප්‍රමාද කිරීම එම දරුවන්ගේ අනාගතයට මහා විනාශයක් කළ හැකි බවය.
(***)
