වැල්ලම්පිටිය වේරගොඩ විද්‍යාලයේ ජල කරාම පද්ධතිය සවිකර තිබූ අනාරක්ෂිත සිමෙන්ති බැම්මක් කඩා වැටීමෙන් ඊට යටවූ එම පාසලේ පළමු වසරේ ඉගෙන ගනිමින් සිටි ෂෙහන්සා නෙත්සරණි නමැති හය හැවිරිදි දියණිය මියගොස් තවත් දරුවන් සිව් දෙනකු තුවාල ලැබීමේ පුවත සියලු පුරවැසියන්ගේ දෙනෙත් කඳුළෙන් තෙත්කර කම්පාවට පත්කර ඇත.
ඉගෙන ගන්න පාසලට ගිය තම දුවා දරුවා නිසල මළ සිරුරක්ව නැවත නිවෙසට පැමිණෙනු ඇතැයි කිසිදු මව්පිය කෙනෙක් නොසිතති. එහෙත් ෂෙහන්සා නෙත්සරණි දියණියගේ මවට පියාට ඒ බරැති වේදනාවෙන් කල් ගත කිරීමට සිදුව තිබේ.
සිද්ධිය වූයේ ඉකුත් 15 වැනිදා පෙරවරු 10.00ට පමණය. සංවේදීම කාරණය වන්නේ එදින ෂෙහන්සා දියණියගේ උපන් දිනය යෙදී තිබීමය. එමෙන්ම එදිනට පාසලේ විදුහල්පතිවරයාගේ ද උපන් දිනය යෙදී තිබී ඇත. ඒ අනුව පන්ති කාමරයේ දී සෙසු දරුවන් සමග එක්ව විදුහල්පතිවරයාත් ෂෙහන්සා දියණියත් කේක් කපා උපන් දිනය සමරා ඇත. සිද්ධිය වී තිබෙන්නේ ඉන් මොහොතකට පසුවය.
පුවත්පත් වාර්තාවලට අනුව ෂෙහන්සා දියණිය ඇතුළු ළමයින් පිරිසක් ජල කරාම පද්ධතිය සවිකර තිබූ සිමෙන්ති බැම්ම ආසන්නයේ සෙල්ලම් කරමින් සිට ඇත. එක්වරම එම සිමෙන්ති බැම්ම කඩා වැටීමෙන් මෙම අනතුර සිදුවී තිබේ. සිද්ධියෙන් පසුව කිසියම් පිරිසක් විදුහල්පතිවරයාට පහර දී ඇති බවත් විදුහල්පතිවරයා ප්‍රතිකාර සඳහා රෝහල්ගත වූ බවත් සඳහන්ය.
පාසල් බිමේ දී සිදු නොවිය යුත්තක් සිදුවී තිබේ. දරුවකුට තම නිවෙස හැරුණු විට ආරක්ෂිතම ස්ථානය පාසලය. එම පාසල තුළ මර උගුල් තිබිය නොහැක. එහෙත් අප රටේ පාසල් පද්ධතිය තිබෙන්නේ ඉතා දුර්වල තත්ත්වයකය. පන්ති කාමර සහිත ගොඩනැගිලි කොයි මොහොතේ කඩා වැටේදෝ යන භීතියෙන් අකුරු ඉගැන්වීමට, ගුරුවරුන්ටත් අකුරු ඉගෙන ගැනීමට දරුවන්ටත් සිදුව ඇති පාසල් ගණන අතිවිශාලය. ප්‍රශ්නය වන්නේ ඒ සම්බන්ධයෙන් ප්‍රමාණවත් අවධානයක් බලධාරින්ගෙන් යොමු නොවීමය.
පාසල් සංවර්ධනය සම්බන්ධයෙන් කප්පරක් වාගාඩම්බර ප්‍රකාශ වුවද පාසල තුළ මරණ බිය පැතිරී ඇත්නම් එය කිසි ලෙසකින් හෝ ඛේදවාචකයකින් වෙනස් නොවන්නකි. ෂෙහන්සා නෙත්සරණි දියණිය යටවූ ජල කරාම සහිත සිමෙන්ති බැම්ම මීට වසර 10කට පෙර ඉදිකර ඇති බවත් එහි කොන්ක්‍රීට් කම්බි කිසිවක් නොදමා කුඩා තාප්පයකට හේත්තුවන සේ සිමෙන්ති බැම්මක් ලෙස ඉදිකර ඇති බවත් අප ප්‍රවෘත්තියේ සඳහන්ය. කොන්ක්‍රීට් ආධාරකයක් නොමැති නිසා එම සිමෙන්ති බැම්ම එකවරම කඩා වැටී ඇතැයි පොලිසිය පවසන බවද අප ප්‍රවෘත්තියේ වැඩිදුරටත් සඳහන්ය.
එම ඉදිකිරීම නිසි ප්‍රමිතියෙන් සිදුකර නොමැති නම් ඒ සම්බන්ධව වගකිවයුත්තන්ට නීතිය ක්‍රියාත්මක කළ යුතුය. මල්කැකුළු වන් දුවා දරුවන් මෙලෙස තලාපෙලා මරා දැමීමට කිසිවකුට අයිතියක් නැත.
ෂෙහන්සා නෙත්සරණි දියණියගේ අකල් මරණය සම්බන්ධයෙන් මෙන්ම තුවාල වූ දරුවන් සම්බන්ධයෙන් අපගේ සංවේගය ප්‍රකාශ කරන අතරම කිසියම් පිරිසක් විදුහල්පතිවරයාට පහරදීම හෙළා දකිමු. මෙබදු අවස්ථාවක දී අතපය දිග හැර ප්‍රශ්න විසඳාගත නොහැකිය. එමෙන්ම දරුවන්ගේ ආරක්ෂාව සම්බන්ධ වගකීමක් විදුහල්පතිවරයාට, ආචාර්ය මණ්ඩලයට ද පාසලේ ආරක්ෂකයන්ට ද තිබේ. එම වගකීම එයට හිමි නිසි අර්ථයෙන් හඳුනාගෙන කටයුතු කරන්නේ නම් බොහෝ අනතුරු වළක්වාගත හැකි බව අපි අවධාරණය කරමු.
(***)
