ඇමෙරිකාවේ නැගෙනහිර වෙරළ තීරයට අයත් ජනපදවලට ඉහළ අහසේ රාත්‍රී කාලයේ මාසයකට ආසන්න කාලයක් තිස්සේ හඳුනා නොගත් අබිරහස් ඩ්‍රෝන යානා සැරිසරන බවට වාර්තා වුවත්, එම ඩ්‍රෝන යානා ඇමෙරිකාවේ ජාතික ආරක්ෂාවට තර්ජනයක් නොවන බව ඇමෙරිකා ජනාධිපති ජෝ බයිඩන් ප්‍රමුඛ රජය කියයි.
මෙම ඩ්‍රෝන යානා සම්බන්ධයෙන් පැමිණිලි 3,000 කට වඩා තමන්ට ලැබී ඇතැයි එෆ්.බී.අයි. කාර්යාංශය පවසයි. ඒ අනුව, එෆ්.බී.අයි. කාර්යාංශයත්, ජාතික ගුවන් ගමන් අධිකාරියත්, ඇමෙරිකාවේ ‘හෝම්ලෑන්ඩ්’ ස්වදේශ ආරක්ෂක කටයුතු සේවය ද විමර්ශන පවත්වා ඇත. අබිරහස් ඩ්‍රෝනවලින් රටේ ජාතික ආරක්ෂාවට තර්ජනයක් නොමැති බව ඔවුන් තහවුරු කර ඇතැයි ද ඇමෙරිකන් රජය පෙන්වා දෙයි.
මෙම අබිරහස් ඩ්‍රෝන යානා පළමුවෙන්ම දකින්න ලැබුණේ පසුගිය නොවැම්බර් 18 වැනිදා නිව් ජර්සි ප්‍රාන්තයට ඉහළින් රාත්‍රී සහ අලුයම් කාලයේය. ඩ්‍රෝන යානා තනි තනිව මෙන්ම පොකුරු වශයෙන් ද අහසේ සැරිසරන ආකාරය ජනතාවට දකින්න ලැබුණි. මේ සම්බන්ධයෙන් චීනයටත් ඉරානයටත් චෝදනා එල්ල වෙමින් පවතී. ඇමෙරිකා ජනාධිපති ධුරයට තේරී පත් වී සිටින ජනාධිපති ඩොනල්ඩ් ට්‍රම්ප් පවා කනස්සල්ල පළ කර ඇත.
