ඇමෙරිකන් වැසියන් ඡන්දය ප්‍රකාශ කරද්දී, ඇමෙරිකන් ජනපද හතරක, ඡන්ද මධ්‍යස්ථානවල බෝම්බ බියක් හටගත්තේය.
ආරක්ෂක අංශ වහා ක්‍රියාත්මක වී ආරක්ෂාව තහවුරු කිරීමට පියවරගත් බැවින්, ඡන්දය ප්‍රකාශ කිරීමේ කටයුතුවලට බාධා එල්ල විය.
බෝම්බ බිය හටගත්තේ ජෝර්ජියා, මිචිගන්, ඇරිසෝනා සහ විස්කොන්සින් යන ජනපදවල ඡන්ද මධ්‍යස්ථාන හතරකය.
බෝම්බ නිෂ්ක්‍රීය අංශ නිලධාරීන් නිල සුනඛයන් ද සමඟ එම මධ්‍යස්ථාන උඩු යටිකුරු කරමින් සෝදිසි කළත් බෝම්බයක් හෝ පුපුරන ද්‍රව්‍ය කිසිවක් හෝ හමු වූයේ නැත.
බෝම්බ තර්ජන එල්ල වූයේ ඊ මේල් පණිවුඩ ලෙසිනි. එම ඊ මේල් පණිවුඩ එවා ඇත්තේ රුසියාවෙන් යැයි මූලික විමර්ශනවලින් තහවුරු වී ඇත. බෝම්බ ඇතැයි පැවැසීම, රුසියාව ඇමෙරිකන් ජනාධිපතිවරණය කඩාකප්පල් කිරීමට ගත් උත්සාහයක් යැයි ආරක්ෂක අංශ චෝදනා කරයි.
(ඒ.එෆ්.පී.)
