ඇමෙරිකානු තලේබාන් සාම නියෝජිතයා ලෙස කටයුතු කළ සැල්මේ කලිල්සාද් සිය තනතුරින් ඉල්ලා අස්විය. තමන් තම තනතුරින් ඉල්ලා අස්වන්නේ, දැඩි සිත් තැවුලෙන් සහ කලකිරීමෙන් යැයි සැල්මේ කලිල්සාද් පවසා තිබේ.
තමන් අපේක්ෂා කළ අන්දමින්, සාමකාමී තිරසාර දේශපාලනික විසඳුමකට යෑමට හෝ තලේබාන් සංවිධානය සමඟ සාමකාමී වැඩපිළිවෙළක් සකස් කර ගැනීමට හෝ නොහැකි වුණු බවත්, ඒ නිසා ඇෆ්ගන් සිවිල් වැසියන් දැඩි ලෙස පීඩාවට පත් වූ බවත් ඒ ගැන තමන් දැඩි ලෙස කනගාටු වන බවත් සැල්මේ කලිල්සාද් මාධ්‍ය හමුවේ පැහැදිලි කර ඇත.
කලිල්සාද් මෙසේ සිය තනතුරින් ඉල්ලා අස්වීමට තීරණය කළේ ඇමෙරිකාව ප්‍රමුඛ නේටෝ හමුදා ඇෆ්ගනිස්තානනයෙන් ඉවත්වී, තලේබාන් සංවිධානය ඇෆ්ගනිස්තානයේ බලය අත්පත් කරගෙන මාස දෙකක් ගත වෙද්දීය. ඇමෙරිකාව ප්‍රමුඛ නේටෝ හමුදා ඇෆ්ගනිස්තානනයෙන් ඉවත් වූයේ පසුගිය අගෝස්තු මාසය අවසානයේදීය.
කලිල්සාද් සිය තනතුරින් ඉවත් වෙද්දී, කලිල්සාද්ගේ දෙවැනියා ලෙස කටයුතු කළ තෝමස් වෙස්ට් තලේබාන් සාම නියෝජිතයා ලෙස කටයුතු කරනු ඇතැයි ඇමෙරිකන් රාජ්‍ය ලේකම් ඇන්තනි බ්ලින්කන් පවසා තිබේ.
කලිල්සාද්, තලේබාන් සාම නියෝජිතවරයා ලෙස පත් කළේ වත්මන් ඇමෙරිකන් ජනාධිපති ජෝ බයිඩන්ට පෙර, ඩොනල්ඩ් ට්‍රම්ප් ජනාධිපති ධුරය හොබවද්දීය. ඇෆ්ගනිස්තානයට සාමය උදා කිරීමට සුදුස්සා කලිල්සාද් ඔහු එම තනතුරට පත් කරමින් ට්‍රම්ප් එදා පෙන්වා දුන්නේය.
බයිඩන් ජනාධිපති ධුරයට පත්වීමෙන් පසුව, ඉදිරියට ගෙන ගියේ අගෝස්තු මාසයේ දී ඇමෙරිකන් හමුදා ඇෆ්ගනිස්තානයෙන් ඉවත් කර ගැනීමත් සිදු කළේ ට්‍රම්ප් පරිපාලනය ඇෆ්ගනිස්තානය සම්බන්ධයෙන් අනුගමනය කළ ප්‍රතිපත්ති ඉදිරියට ගෙන යමිනි.
(රොයිටර්)
