යුරෝපා රටක් වන ඉතාලියේ සිසිලි දූපතේ උෂ්ණත්වය, වාර්තාගත ලෙස සෙල්සියස් අංශක 48.8 තෙක් ඉහළ ගොස් ඇති බවත්, ඉතිහාසයේ පළමු වරට යුරෝපා රටකින් මෙතරම් ඉහළ උෂ්ණත්වයක් වාර්තා වුණු පළමු අවස්ථාව මෙය බවත් ජගත් කාලගුණ විද්‍යා සංවිධානය පෙන්වා දෙයි.

ජගත් කාලගුණ විද්‍යා සංවිධානයට අනුව, මේ වනවිට යුරෝපා රටවල් බොහොමයකින් ඉහළ උෂ්ණත්වයක් වාර්තා වන අතර, ග්‍රීසියේ ඇතන්ස් නුවර උෂ්ණත්වය සටහන් වී ඇත්තේ සෙල්සියස් අංශක 48 ක් ලෙසිනි. අවසන් වරට ග්‍රීසියේ උෂ්ණත්වය මේ අයුරින් සෙල්සියස් අංශක 48 සීමාවට ළං වී ඇත්තේ 1977 වසරේදීය.

ඉතාලි සෞඛ්‍ය අමත්‍යාංශය එරට ජනතාවට අනතුරු ඇඟවීම් කර ඇත්තේ අධික උණුසුම් කාලගුණය හේතුවෙන් සෞඛ්‍ය ගැටලු ඇතිවීමේ අවදානමක් පවතින බවය.

වියළි කාලගුණය සහ වියළි සුළං හේතුවෙන්, සිසිලියේ පමණක් නොව, කැලබිරා සහ පුග්ලියා යන පළාත්වල ළැව් ගිනි හටගෙන ඇති බවත් ළැව් ගිනි නිවා දැමීමට ගිනි නිවන භටයන්ට හමුදාවේ සහාය ලබා දෙන  බවත් ඉතාලි රජය පවසා ඇත.

ඉතාලියේ පමණක් නොව, ග්‍රීසිය, තුර්කිය සහ ඇල්ජීරියාව යන රටවල මේ වනවිට දරුණු ලෙස ළැව් ගිනි වාර්තා වන බවත් ඒවා පාලනය කිරීමට ගිනි නිවන භටයන්ට මහත් පරිශ්‍රමයක් දැරීමට සිදුවන බවත් වාර්තා වේ.

'කොවිඩ් 19' වසංගතයෙන් පමණක් නොව, මේ වනවිට විපරිත කාලගුණ විපර්යාස හේතුවෙන් ද ලොව රටවල් රැසක වැසියන් පීඩාවට පත්වී සිටින බවත්, මෙසේ විපරිත කාලගුණ තත්ත්වයන් නිර්මාණය වීමට හේතුව මිනිස් ක්‍රියාකාරකම් බවත් ජගත් පරිසරවේදීහු පෙන්වා දෙති.

(බීබීසී)