ඉන්දීය පාලනය යටතේ තිබෙන කාශ්මීරයේ ආර්ථික සහ දේශපාලන කටයුතු යථා තත්ත්වයට පත්වීම සම්බන්ධයෙන් ඇමෙරිකා එක්සත් ජනපදය සිය සතුට පළ කර ඇත.
ඉන්දීය පාලනයේ තිබෙන ජම්මු සහ කාශ්මීරයේ ආර්ථික සහ දේශපාලන කටයුතු යථා තත්ත්වයට පත් කිරීමටත් රටේ ප්‍රජාතන්ත්‍රවාදී අගනාකම්වලට අනුව ඒවා පවත්වාගෙන යෑමටත් පියවර ගැනීම ඇගයිය යුතු බව මේ සම්බන්ධයෙන් අදහස් දක්වමින් ඇමෙරිකානු රාජ්‍ය දෙපාර්තමේන්තුවේ ප්‍රකාශක නෙඩ් ප්‍රයිස් පැවැසීය.
‘‘ජම්මු හා කාශ්මීරයේ ආර්ථික සහ දේශපාලන කටයුතු සාමාන්‍ය තත්ත්වයට පත් කිරීමට ඉන්දීය රජය ගෙන ඇති ක්‍රියාමාර්ග සම්බන්ධයෙන් අප සතුටට පත්වෙනවා. ඉන්දියාවේ ප්‍රජාතන්ත්‍රවාදී අගනාකම් සමඟ අඛණ්ඩව ගමන් කරමින් ජම්මු හා කාශ්මීරයේ තත්ත්වය යථා තත්ත්වයට පත් කිරීම අගය කළ යුතු යි. ජම්මු හා කාශ්මීරයේ සිදුවීම් දෙස අපි සමීපව බලා සිටිනවා’’ යැයි හෙතෙම කීය.
ඇමෙරිකානු රාජ්‍ය දෙපාර්තමේන්තුවේ ප්‍රකාශක නෙඩ් ප්‍රයිස් ඉන්දු-ඇමෙරිකානු සබඳතා සම්බන්ධයෙන් ද මෙහිදි අදහස් දැක්වීය.
ඉන්දියාව සමඟ අපට පුළුල් ගෝලීය උපායමාර්ගික හවුල්කාරීත්වයක් තිබෙනවා යැයි හෙතෙම එහිදි කීය.
‘‘පාකිස්තානයත් අපට වැදගත්. අප සියලු දෙනාට පොදුවේ බෙදාහදාගත් අභිලාෂ තිබෙනවා. ඒ නිසා මේ කරුණුවලදී අපි පාකිස්තානය සමඟ ද සමීපව වැඩ කරනවා’’ යැයි ඔහු කීය.
ජම්මු හා කාශ්මීරයේ ජංගම දුරකතන සහ අන්තර්ජාල සම්බන්ධතා ඇණ හිට තිබූ අතර පෙබරවාරි මාසයේ දී ඒවා යථා තත්ත්වයට පත්විය.
එන්.ඩී.ටීවී./රොයිටර්
055
