ඉන්දීය නාවික හමුදා භට පිරිසක් රැගෙන යාත්‍රා කරමින් තිබුණු කුඩා අධිවේගී බෝට්ටුවක්, මුම්බායි වෙරළට ඔබ්බෙන් අරාබි මුහුදේ දී මගී ප්‍රවාහන නෞකාවක ගැටී අනතුරක් සිදුවිය.
එම අනතුරින්, නාවික හමුදා සාමාජිකයන් ද ඇතුළු 13 දෙනෙක් ජීවිතක්ෂයට පත්වූහ. අනතුර සිදුවූයේ, නාවික හමුදාවට අයත් එම අධිවේගී බෝට්ටුව පාලනය කර ගැනීමට නොහැකි වූ බැවිනි.
අනතුර සිදුවන ආකාරය මගී ප්‍රවාහන නෞකාවේ සිටි අයකුගේ ජංගම දුරකතනයේ සටහන් වූ අතර, එය මේ වනවිට සමාජ මාධ්‍ය සහ විදෙස් පුවත් සේවා ඔස්සේ ප්‍රසිද්ධියට පත් වී තිබේ.
අනතුරින් මියගිය නාවික හමුදා සාමාජිකයන් ගණන තුනකි. අධිවේගී බෝට්ටුව හැපීමෙන් මගී යාත්‍රාවට හානි සිදුවිය. එහි සිටි පුද්ගලයන් සියයකට වැඩි පිරිසක් සිටි අතර, ඔවුන්ට කඩිනමින් ආරක්ෂාව ලබා දීමට නාවික හමුදාව පියවර ගත්තේය. සිදුවුණේ කුමක්දැයි යන්න සම්බන්ධයෙන් විශේෂ විමර්ශනයක් පැවැත්වීමට නාවික හමුදාව තීරණය කර ඇත.
