ලොව දිළිඳු සහ සංවර්ධනය වෙමින් පවතින රටවල් 131 කට එන්නත් නොමිලේ ලබා දීමට ආරම්භ කළ 'කොවැක්ස්' වැඩසටහන මේ වනවිට අර්බුදයකට ලක් වී ඇතැයි ලෝක සෞඛ්‍ය සංවිධානය පවසයි.
'කොවැක්ස්' වැඩසටහනේ දී සිදුවන්නේ ලෝක සෞඛ්‍ය සංවිධානය එන්නත් නිෂ්පාදකයන්ගෙන් එන්නත් මිලදී ගෙන ඒවා බෙදා දීමය.
ඊට අමතරව, ඇමෙරිකාව ප්‍රංශය ඇතුළු බටහිර රටවලින් ද ආධාර වශයෙන්, ලෝක සෞඛ්‍ය සංවිධානයේ 'කොවැක්ස්' වැඩසටහනට එන්නත් ලැබීම සිදුවෙයි.
එසේ වුවත් ප්‍රමාණවත් ලෙස එන්නත් නොලැබීම නිසා ක්‍රමාණුකූලව සහ නිසි වේලාවට එන්නත් බෙදා දීමට නොහැති වී ඇති බවත් එම නිසා එන්නත්කරණ වැඩසටහන බරපතල ලෙස අර්බුදයකට ලක් වී ඇති බවත් ලෝස සෞඛ්‍ය සංවිධානයේ ප්‍රධානී ඇඩ්හොම් ගෙබ්‍රියේසස් පැහැදිලි කර තිබේ.
ලෝක සෞඛ්‍ය සංවිධානය ඔවුන්ගේ 'කොවැක්ස්' වැඩසටහන ආරම්භ කළේ ඉන්දියාවේ නිෂ්පාදිත 'ඔක්ස්ෆර්ඩ් ඇස්ට්‍රාසෙනකා කොවිෂීල්ඩ්' එන්නත යොදා ගනිමිනි. කෙසේ නමුත්, නිෂ්පාදිත 'ඔක්ස්ෆර්ඩ් ඇස්ට්‍රාසෙනකා කොවිෂීල්ඩ්' එන්නත ප්‍රමාණවත් තරමින් නිෂ්පාදනය කිරීමට ඉන්දියාවේ 'සේරම්' සමාගම අපොහොසත් වීමත්, ඉන්දීය රජය එරට නිපදවන එන්නත් අපනයනය නැවැත්වීමත් නිසා 'කොවැක්ස්' වැඩසටහනට ප්‍රමාණවත් අයුරින් එන්නත් ලැබුණේ නැත.
'ඔක්ස්ෆර්ඩ් ඇස්ට්‍රාසෙනකා කොවිෂීල්ඩ්' එන්නතේ පළමු මාත්‍රාව ලෙස එන්නත් ලබා දුන් රටවල් බොහොමයකටට දෙවැනි මත්‍රාවක් ලබා දීම සිදුනොවිණි.
එන්නත් ලබා දෙන එම රටවල් 131 කට එන්නත් මාත්‍රා මිලියවන 90 ක් මේ වනවිට බෙදා දී අවසන් යැයි ද ලෝක සෞඛ්‍ය සංවිධානයේ ප්‍රධානියා පැවැසුවත්, ඔහු පැහැදිලි කරන ආකාරයට කොරෝනා වයිරස වසංගතය පාලනය කිරීමට එය කිසිසේත් ප්‍රමාණවත් නොවෙයි.
අප්‍රිකා රටවලට එන්නත් ලබා දී ඇත්තේ සියයට 2 ක ප්‍රතිශතයක් පමණක් යැයි ද ලෝක සෞඛ්‍ය සංවිධානයේ ප්‍රධානියා පවසයි. 'කොවැක්ස්' වැඩසටහන හරහා අප්‍රිකා රටවලට බෙදා දී ඇත්තේ එන්නත් මිලියන 40 ක් පමණි.
ජිනීවාහිදීය (රොයිටර්)
