ඇමෙරිකන් ජනාධිපතිවරණයට ඉදිරිපත් වූ ඩිමොක්‍රටික් පක්ෂ ජනාධිපති ධුර අපේක්ෂිකා වත්මන් උප ජනාධිපතිනී කමලා හැරිස් පරාජය බාර ගත්තාය.
පරාජයෙන් පසු වොෂින්ටන් අගනුවර හාවඩ් විශ්ව විද්‍යාලයේ දී ඩිමොක්‍රටික් පක්ෂ ආධාරකරුවන් හමුවේ පෙනී සිටිමින්, ඇය ජාතිය ඇමතීමක් ද කළාය. එම අවස්ථාවේදී ට්‍රම්ප්ගේ ජයග්‍රහණය සම්බන්ධයෙන් නොසතුටට පළ කළ හැරිස්, අවධාරණය කළේ සාමකාමී අයුරින් ට්‍රම්ප් සමඟ සුහඳ බල හුවමාරුවකට සූදානම් බවය.
ජනාධිපතිවරණයේ ප්‍රතිඵල තමන් පිළිගන්නා නමුත්, ඇමෙරිකාවේ ප්‍රජාතන්ත්‍රවාදය වෙනුවෙන් සහ රටේ නීතිය වෙනුවෙන් දිගටම සටන් කරන බව ද හැරිස් අවධාරණය කළාය.
මැතිවරණ රැළිවලදී හැරිස්, ඩොනල්ඩ් ට්‍රම්ප් විවේචනය කරමින් පැවැසුවේ, ට්‍රම්ප් යළි ඇමෙරිකාවේ ජනාධිපති වුවහොත්, රටේ ප්‍රජාතන්ත්‍රවාදය අනතුරට පත්වනු ඇති බවය.
60 හැවිරිදි හැරිස්, ජනපති සටනට එක් වූයේ, ජනාධිපති ජෝ බයිඩන් ජනාධිපතිවරණ සටනින් ඉවත් වුණු බැවිනි. බයිඩන් එසේ කළේ, ඔහුගේ වයස ඔහුට බාධාවක් වූ බැවිනි.
ජනාධිපති බයිඩන්, ට්‍රම්ප්ට සුබ පතමින්, ධවල මන්දිරයේ හමුවකට පැමිණෙන්නැයි ඇරැයුම් කර ඇත. ජනාධිපති ධුරයට පත්වුණු ට්‍රම්ප්ගේ ජය තහවුරු කිරීම සහ ඔහු 47 වැනි ජනාධිපති ලෙස දිවුරුම් දීම සිදුවන්නේ ලබන වසරේ ජනවාරියේ මාසයේය.
