රුසියාවට සහාය දක්වමින් රුසියන් යුක්රේන යුද්ධයට සම්බන්ධ වී සිටින උතුරු කොරියානු සොල්දාදුවන් බොහෝ දෙනකු මේ වනවිට යුක්රේන හමුදා ප්‍රහාර හමුවේ ජීවිතක්ෂයට පත්ව ඇති බවත්, තවත් සෙබළුන් කීප දෙනකු තුවාල ලබා සිටින බවත් විදෙස් මාධ්‍ය පවසයි.

උතුරු කොරියානු සෙබළුන් මියගොස් ඇත්තේ, රුසියාවේ කුර්ක්ස් දේශසීමා ප්‍රදේශයේ පැවැති සටන්වලදීය. යුක්රේන බුද්ධි අංශ පවසන ආකාරයට මියගිය උතුරු කොරියානු සෙබළුන් ගණන 30 කට වැඩිය. කෙසේ නමුත්, රුසියාව හෝ උතුරු කොරියාව හෝ මේ සම්බන්ධයෙන් කිසිදු ප්‍රකාශයක් සිදු කර නැත. රුසියන් යුක්රේන යුද්ධයට මැදිවී සිටින උතුරු කොරියානු සොල්දාදුවන් ගණන 11,000 කි.

රුසියාව සහ උතුරු කොරියාව අතරේ සමීප මිතුදම් පවතී. උතුරු කොරියාවේ මිසයිල වැඩසටහනටත්, එරට අභ්‍යවකාශ වැඩසටහනටත් අනුග්‍රහය දක්වන්නේත් සහාය දක්වන්නේත් රුසියාවය. රුසියන් ජනාධිපති  ව්ලැදිමීර් පුටින් සහ උතුරු කොරියානු නායක කිම් ජොන් උන් අතරේ පවතින මෙම හිතවත්කම නිසාය.