පාකිස්තානයේ විපක්ෂ නායක ෂබාස් ෂරීෆ්ගේ නම එරට පිටවීමේ පාලන ලැයිස්තුවට ඇතුළත් කිරීමට රජය පියවර ගෙන ඇත.
විපක්ෂ නායකවරයාගේ නම රටින් පිටවීම පාලන ලැයිස්තුවට ඇතුළත් කිරීමට පාකිස්තාන ෆෙඩරල් කැබිනට් මණ්ඩලය ඉකුත් දිනෙක අවසරය ලබාදුන්නේ ය. එලෙස අවසර දීමෙන් පසු පාකිස්තානයේ අභ්‍යන්තර කටයුතු අමාත්‍යවරයා විපක්ෂ නායකවරයාගේ නම ලැයිස්තුවට ඇතුළත් කරන්නැයි එරට බලධාරීන්ට උපදෙස් දුන්නේ ය.
මේ අනුව පාකිස්තාන විපක්ෂ නායකවරයාට රටින් පිටවීම තහනම් යැයි වාර්තා වේ.
ෂබාස් ෂරීෆ් පාකිස්තානයේ, පාකිස්තාන් මුස්ලිම් ලීග්-නවාස් (පී.එම්.එල්.-එන්) වත්මන් සභාපතිවරයා ය. එම පක්ෂය පාකිස්තානයේ ප්‍රධාන දේශපාලන පක්ෂ තුනෙන් එකක් වන අතර පාකිස්තාන් මුස්ලිම් ලීග් - නවාස් පක්ෂය ආරම්භ කරන ලද එරට හිටපු අග්‍රාමාත්‍ය නවාස් ෂරීෆ් ය.
පාකිස්තානයේ ජාතික දූෂණ විරෝධී කාර්යාංශයේ නිල ඉල්ලීමකට අනුව අමාත්‍ය මණ්ඩලය මෙලෙස විපක්ෂ නායකවරයාට රටින් පිටවීම තහනම් කර ඇතැයි ජියෝ පුවත් මූලාශ්‍ර සඳහන් කරයි. ඒ අනුව පාකිස්තාන ෆෙඩරල් කැබිනට් මණ්ඩලයේ උප කමිටුවක් විපක්ෂ නායකවරයාට රටින් පිටවීම තහනම් කරන්නැයි නිර්දේශ කර තිබේ.
මේ සම්බන්ධයෙන් අභියාචනයක් ඉදිරිපත් කිරීමට පාකිස්තාන මුස්ලිම් ලීගයේ - නවාස් සභාපතිවරයාට දින 15ක කාලයක් තිබෙන බව ද ඉකුත් දිනෙක මාධ්‍ය හමුවක් පවත්වමින් පාකිස්තානයේ අභ්‍යන්තර කටයුතු අමාත්‍ය ශෙයික් රෂීඩ් සඳහන් කළේය.
ඒ.එන්.අයි.
