මාලදිවයින පාකිස්තානයේ සිටි ඔවුන්ගේ තානාපති මොහොමඩ් තෝහා ආපසු ගෙන්වා ගැනීමට පියවර ගත්තේය. ඒ, මාලදිවයින රජයට නොදන්වා, ඔහු පාකිස්තානයේ ඉස්ලාමාබාද් අගනුවරට පැමිණ සිටි ඇෆ්ගන් තලේබාන් රජයේ නියෝජිතයකු හමුවී සාකච්ඡා කිරීම සම්බන්ධයෙනි.
පාකිස්තානයේ මාලදිවයින තානාපති මොහොමඩ් තෝහා, ඉස්ලාමාබාද් අගනුවරදී ඇෆ්ගන් රජයේ විශේෂ නියෝජිත සර්දාර් අහ්මද් ෂකීබ් හමුවීම සම්බන්ධයෙන් පාකිස්තාන රජය සහ එරට මාධ්‍ය විශාල ප්‍රසිද්ධියක් ද ලබා දී තිබුණි.
කෙසේ නමුත්, මාලදිවයින විදේශ කටයුතු අමත්‍යාංශය පවසා ඇත්තේ, මාලදිවයින තානාපතිට, ඇෆ්ගන් රජයේ විශේෂ නියෝජිත සර්දාර් අහ්මද් ෂකීබ් හමුවන්නැයි මාලදිවයින රජය අවසර කර නොතිබුණු බවත්, මොහොමඩ් තෝහා, සහ සර්දාර් අහ්මද් ෂකීබ් අතර හමුව මාලදිවයින රජයේ අනුදැනුම යටතේ සිදුවූවක් නොවන බවත්ය.
ඇෆ්ගනිස්තානය තලේබාන් ග්‍රහණයට නතු වූයේ 2021 වසරේ දී ඇමෙරිකන් හමුදා එරටින් පිටවී යෑමෙන් පසුවය. තලේබාන්වරුන් නව රජයක් පිහිටුවූ අතර, ෂරියා නීතිය ක්‍රියාත්මක කළේය. තවමත් කිසිදු රටක් තලේබාන් පාලනය යටතේ පවතින ඇෆ්ගනිස්තානය සමඟ නිල වශයෙන් සම්බන්ධකම් පවත්වන්නේ නැත.
(එන්.ඩී.ටීවී.)
