ඉන්දියාවේ උපන්, බ්‍රිතාන්‍ය ජාතික ලේඛක ශ්‍රීමත් සල්මාන් රුෂ්ඩිට එල්ල වූ පිහි ප්‍රහාරය හෙලා දකිමින් බ්‍රිතාන්‍යයේ වැඩ බලන අග්‍රාමාත්‍ය බොරිස් ජොන්සන්, ප්‍රංශ ජනාධිපති ඉමැනුවෙල් මැක්රොන් ඇතුළු බටහිර රටවල රාජ්‍ය නායකයෝ අප්‍රසාදය පළ කර තිබේ.
ඉන්දිය විදේශ කටයුතු අමාත්‍ය එස්. ජයිශංකර් ද සල්මාන් රුෂ්ඩිට එල්ල වූ ප්‍රහාරය හෙලා දකිමින් ප්‍රකාශයක් නිකුත් කර ඇතැයි ඉන්දීය මාධ්‍ය වාර්තා කර තිබේ.
ඇමෙරිකන් ජාතික ආරක්ෂක උපදේශක ජේක් සලවන් ට්විටර් පණිවුඩයක් හරහා රුෂ්ඩිට ඉක්මන් සුව ප්‍රාර්ථනා කර ඇත. ඇමෙරිකන් ජනාධිපති ජෝ බයිඩන් ද සිද්ධිය ගැන කනගාටු වෙමින් ප්‍රකාශයක් නිකුත් කර තිබේ.
1989 වසරේ දී මරණ තර්ජන එල්ල වීමෙන් පසු රුෂ්ඩි, බ්‍රිතාන්‍ය රජය ලබා දුන් පොලිස් ආරක්ෂාව මැද බ්‍රිතාන්‍යයේ සැඟවී ජීවත් විය.
සාහිත්‍යය සඳහා කළ සේවය වෙනුවෙන් බ්‍රිතාන්‍ය රජයෙන් රුෂ්ඩි 2007 දී නයිට් පදවිය හිමිවිය. රුෂ්ඩිගේ නවතම කෘතිය ‘වික්ටරි සිටී’ ලබන පෙබරවාරියේ එළි දැක්වීමට නියමිත බව පැවැසෙයි. රුෂ්ඩි ඇමෙරිකාවේ පදිංචියට ගොස් ඇත්තේ 2000 වසරේදීය. ශ්‍රීමත් සල්මාන් රුෂ්ඩි, සිවු වතාවක් විවාහ වී ඇති අතර ඔහුට දරුවෝ දෙදෙනෙකි.
ඉස්ලාම් දහමට සහ මහම්මත්තුමාට අපහාස කළේ යැයි චෝදනා ලැබූ බ්‍රිතාන්‍ය ලේඛක ශ්‍රීමත් සල්මාන් රුෂ්ඩිට එල්ල වූ ප්‍රහාරය සම්බන්ධයෙන් ඉරානයේ ජාතික පුවත්පත් ප්‍රශංසා පළ කර ඇතැයි වාර්තා වේ. ඉරාන ජාතික පුවත්පත් බොහොමයක කතුවැකි වෙන්වී ඇත්තේ ද සල්මාන් රුෂ්ඩි එල්ල වූ ප්‍රහාරය ගැන ගුණ වයමින් යැයි ද පැවැසෙයි.
සල්මාන් රුෂ්ඩිට පිහි ප්‍රහාරය එල්ල කළේ ඉරාන රජයට සහ විප්ලවීය හමුදාවට හිතවාදී ෂියා මුස්ලිම් ඇමෙරිකන් තරුණයෙකි. එසේ වුවත් හදි මටාර් නමැති මෙම තරුණයා ඉරානය සමඟ හෝ ඉරාන විප්ලවීය හමුදාව හෝ කිසිදු සම්බන්ධයක් ඇති අයකු නොවන බව ඇමෙරිකන් ආරක්ෂක අංශ පවසා තිබේ.
හදි මටාර් ඇමෙරිකාවේ උපත ලැබූවකු වන අතර, ඔහුගේ මාපියන් ලෙබනනයේ සිට ඇමෙරිකාවේ පදිංචියට ආ සංක්‍රමණික යුවළකි. හදි මටාර් සම්බන්ධයෙන් පෙර වැරැදි කිසිවක් නොමැති බව ද පොලිසිය පවසා තිබේ.
ප්‍රධාන පෙළේ ඉරාන රාජ්‍ය පුවත්පතක් වන ‘කයාන් නිවුස්’ පුවත්පත කතු වැකිය පළ කර තිබුණේ දෙවියන්ට අපහාස කළ ලේඛකයාට නිසි දඩුවම් හිමිවුණු බව පෙන්වා දෙමිනි. ‘අසාර්’, ‘කොරසාන්’, ‘වටාන් එම්රෝස්’ යන පුවත්පත් ද සල්මාන් රුෂ්ඩි ට එල්ල වුණු ප්‍රහාරය සම්බන්ධයෙන් ප්‍රශංසා කර තිබේ.
ඉරාන වැසියන් ද රුෂ්ඩිට එල්ල වුණු ප්‍රහාරය සම්බන්ධයෙන් අදහස් දක්වමින් පවසා ඇත්තේ ඉස්ලාම් දහමට සහ දෙවියන්ට අපහාස කළ කෙනකුට නිසි දඩුවම් හිමිවිය යුතු බවය. ඉරාන රාජ්‍ය මාධ්‍ය සහ ඉරාන වැසියන් මෙසේ අදහස් දක්වා තිබුණත් ඉරාන රජය රුෂ්ඩිට එල්ල වුණු ප්‍රහාරය සම්බන්ධයෙන් කිසිදු ප්‍රකාශයක් සිදු කර නැත.
(රොයිටර්)
