රුසියාව යුක්රේනය ආක්‍රමණය කිරීම සම්බන්ධයෙන්, ඇමෙරිකාව සහ රුසියාව අතර එදිරිවාදිකම් පැවැතියත්, අභ්‍යවකාශ නැවැතුම්පොළේ රැඳී සිටි ඇමෙරිකන් නාසා ගගනගාමී මාක් වොන්දේ ආපසු පොළොවට රැගෙන ඒමට රුසියාව කටයුතු කළේය. ඒ, රුසියාවේ ‘සෝයූස්’ ගගන කැප්සියුලයෙනි.

නාසා ගගනගාමී මාක් වොන්දේ සමඟ රුසියන් ගගනගාමීන් වන ඇන්තොන් සැක්පර්ලෝව් සහ යොත්‍රෙ ඩුව්රෝව් ද ‘සෝයූස්’ ෂටලයෙන් ආපසු පෘථිවියට පැමිණියහ. රුසියාවේ වේලාවන් උදේ 7.28 ට පමණය. ෂටලයට සුපුරුදු පරිදි කසක්ස්තානයට ගොඩබෑවේය. මාක් වොන්දේ නාසා ආයතනයේ නිලධාරීන් සමඟ ආපසු ඇමෙරිකාව බලපා පැමිණියේය. 55 හැවිරිදි මාක් වොන්දේ දින 355 ක් අභ්‍යවකාශ නැවැතුම්පොළේ රැඳී සිටියේය. ඒ වැඩිම දින ගණනක් අභ්‍යවකාශ නැවැතුම්පොළේ රැඳී සිටි ගගනගාමියා ලෙස වාර්තාවක් ද තබමිනි.

අතීතයේ අභ්‍යවකාශ කටයුතුවලදී රුසියාවත් ඇමෙරිකාවත් එදිරිවාදිකම් පසෙකළා එක්වී කටයුතු කළේය. දේශපාලනය අභ්‍යවකාශ කටයුතුවලට සම්බන්ධ නොවිණි. කෙසේ නමුත් පසුගිය පෙබරවාරි 24 වැනිදා රුසියාව යුක්රේනයට එරෙහි හමුදාමය ක්‍රියාමාර්ගයක් ආරම්භ කිරීමත් සමඟ එම කටයුතු අඩපණ විය. ඒ, ඇමෙරිකාව ඇතුළු බටහිර රටවල් රුසියාවට පැනැවූ සම්බාධක හේතුවෙනි.

රුසියානු අභ්‍යවකාශ ආයතනය වන ‘රොස්කොස්මොස්’ සහ යුරෝපා අභ්‍යවකාශ ආයතනය අඟහරු මෙහෙයුමකට සියලු කටයුතු සූදානම් කර තිබුණු අතර, එම මෙහෙයුම ද සම්පූර්ණයෙන් නැවැත්වීමට යුරෝපා රටවල් තීරණය කර තිබේ. ඒ රුසියාවට විරෝධය දක්වමිනි.

(රොයිටර්)