ඇමෙරිකානු ‘ටයිම්’ සගරාව, වසරේ පුද්ගලයා ලෙස, ඇමෙරිකන් ජනාධිපති ධුරයට දෙවැනි වරට තේරී පත් වුණු ඩොනල්ඩ් ට්‍රම්ප් නම් කර තිබේ. ඒ අනුව, නවතම ‘ටයිම්’ සඟරාවේ කවරය සහ ඇතුළු පිටු ට්‍රම්ප්ගේ ඡායාරූපවලින් සහ ලිපිවලින් පමණක් නොව, ට්‍රම්ප් සම්බන්ධ කර ගනිමින් සිදු කළ සම්මුඛ සාකච්ඡාවකින් ද හැඩ ගැනුවෙනු ඇත.
‘ටයිම්’ සඟරාව ලොව ප්‍රසිද්ධතම සඟරාවලින් එකකි. සෑම වසරකම ලොව කැපී පෙනෙන චරිතයක්, වසරේ පුද්ගලයා ලෙස නම් කිරීමට ‘ටයිම්’ සඟරාව කටයුතු කරයි. ‘ටයිම්’ සඟරාව විසින්, ඩොනල්ඩ් ට්‍රම්ප් වසරේ පුද්ගලයා ලෙස නම් කළ දෙවැනි අවස්ථාව වන්නේ මෙයයි.
පළමු වරට ‘ටයිම්’ සඟරාව, ඩොනල්ඩ් ට්‍රම්ප් වසරේ පුද්ගලයා ලෙස නම් කළේ 2016 වසරේ පැවැති ඇමෙරිකන් ජනාධිපතිවරණයෙන් ඔහු ජය ගත් අවස්ථාවේදීය.
‘ඇමෙරිකන් දේශපාලනයේ පෙරැළි කරමින්, ඇමෙරිකන් දේශපාලනය නව මඟකට යොමු කරන අයකු ලෙස ට්‍රම්ප් සැලකිය හැකි යැයි ‘ටයිම්’ සඟරාවේ, කර්තෘ සෑම් ජේකොබ්ස් පෙන්වා දී ඇත.
ට්‍රම්ප් සම්බන්ධ කර ගනිමින් පැවැත්යූ සම්මුඛ සාකච්ඡාවේදී, නව ධුර කාලයේදී ඉරානය සමඟ යුද්ධ කරනවාදැයි ‘ටයිම්’ සඟරාව ට්‍රම්ප්ගෙන් විමසයි. ‘ඒක කියන්න බැහැ. ඕනෑම වෙලාවක ඉරානය සමඟ යුද්ධයකට යන්න පුළුවන්’ යැයි ට්‍රම්ප් පිළිතුරු දී ඇත.
