ඉන්දියාවේ තත්ත්වය උත්සන්න වීමත් සමඟ වෛද්‍ය අංශවල සහායට ඉන්දීය ගුවන් හමුදාව කැඳවා ඇත.
ඒ අනුව ඔක්සිජන් ටැංකි සහිත කන්ටේනර් රථ, සිලින්ඩර්, අත්‍යවශ්‍ය ඖෂධ සහ වෛද්‍යවරුන් ඇතුළු සෞඛ්‍ය කාර්යමණ්ඩල ඉන්දියාවේ විවිධ ස්ථාන සඳහා රැගෙන යෑමට ඉන්දීය ගුවන් හමුදාව සහාය දක්වනු ඇත.
ඉන්දියාව තුළ පැතිර යන ‘කොවිඩ්-19’ හෙවත් නව කොරෝනා වයිරස ව්‍යාප්තියේ දෙවැනි රැල්ලත් සමඟ ඉන්දියාවේ ඔක්සිජන් අවශ්‍යතාව ශීඝ්‍රයෙන් ඉහළ ගොස් ඇත. මේ හේතුවෙන් ඉන්දියාවේ සෑම ප්‍රදේශයකටම ඔක්සිජන් සිලින්ඩර් ඇතුළු වෛද්‍ය අවශ්‍යතා කඩිනමින් අවශ්‍ය වී තිබේ.
මේ හේතුවෙන් නව කොරෝනා වයිරස වසංගතය මර්දනය කිරීමේ ඉන්දීය රජයේ කර්තව්‍යයට සහාය වීම සඳහා මෙලෙස ඉන්දීය ගුවන් හමුදාව කැඳවා තිබේ.
ඉන්දීය ගුවන් හමුදාවේ නිලධාරීන්ට අනුව ඉන්දීය ගුවන් හමුදාව මේ වනවිටත් කෝචි, මුම්බායි, විසාග් සහ බෙංගලූරුහි සිට දිල්ලියේ පිහිටි ආරක්ෂක සංවර්ධන පර්යේෂණ ආයතනය වෙත වෛද්‍යවරුන් සහ හෙද කාර්යමණ්ඩල ගුවනින් ප්‍රවාහනය කර ඇත. දිල්ලියේ පිහිටි ආරක්ෂක සංවර්ධන පර්යේෂණ ආයතනය සහ එම පරිශ්‍රයේ මේ වනවිටත් වෛද්‍යවරුන් සහ හෙද හෙදියන් ගුවනින් ප්‍රවාහනය කර ඇත.
“ගුවන් හමුදාව ආරක්ෂක සංවර්ධන පර්යේෂණ ආයතනය තිබෙන ඔක්සිජන් ටැංකි බැංගලෝරයේ සිට දිල්ලියේ තිබෙන ‘කොවිඩ්-19’ මධ්‍යස්ථාන වෙත ගුවනින් ප්‍රවාහනය කළා” යැයි තවත් නිලධාරියෙක් කීය.
මේ අතර ඉන්දියාව පුරා පීඩාවට පත්ව සිටින ජනතාවට සහාය දැක්වීමටත් සෞඛ්‍ය අංශවලටත්, ‘කොවිඩ්-19’ මර්දනය කිරීමේ ඉන්දීය රජයේ ක්‍රියාන්විතයටත් සහාය දැක්වීම ආරක්ෂක අංශ සියල්ලට උපදෙස් දී ඇතැයි ඉන්දියාවේ ආරක්ෂක අමාත්‍ය රාජ්නාත් සිං පැවැසීය.
‘ඉන්දියා ටුඩේ’ ඇසුරිනි
