උපුල් වික්‍රමසිංහ

ශ්‍රී ලංකාවෙන් ඇමෙරිකාවට අපනයනය කරන භාණ්ඩ සඳහා අය කරනු ලබන තීරු බදු සියයට 44 දක්වා වැඩි කිරීමට ඩොනල්ඩ් ට්‍රම්ප් පරිපාලනය ගත් තීරණයත් සමග මෙරටින් ඇමෙරිකානු වෙළෙඳපොළට අපනයනය කරන ඇඟලුම්වල මිල ගණන් සියයට 54 කින් පමණ ඉහළ ගොස් ඒවායෙහි අලෙවිය පහත වැටිය හැකි යැයි ද එහි ප්‍රතිඵලයක් ලෙස ඇඟලුම් අපනයන ආදායම් අඩු විය හැකි යැයි ද ඒකාබද්ධ ඇඟලුම් සංගම් සංසදය පවසයි.

එම සංසදයේ උපසභාපති ෆීලික්ස් ඒ. ප්‍රනාන්දු ඉරිදා ලංකාදීපය වෙත ප්‍රකාශ කළේ මේ තීරු බදු හේතුවෙන් මෙරට ඇඟලුම් කර්මාන්තයට දැඩි අහිතකර බලපෑම් එල්ල විය හැකි බවයි. පවතින තත්ත්වය හමුවේ ඇමෙරිකාවෙන් මෙරටට ආනයනය කරන භාණ්ඩ මත පනවා ඇති තීරු බදු ප්‍රතිශත අඩු නොකළ හොත් හෝ ගෙන්වන භාණ්ඩ ප්‍රමාණය වැඩි නොකළ හොත් හෝ ඇමෙරිකාවේ ඇඟලුම් ගැනුම්කරුවන් ලංකාවේ ඇඟලුම් සැපයුම්කරුවන් අතහැර වෙනත් රටවල සැපයුම්කරුවන් ගෙන් සේවා ලබා ගැනීමට වැඩි ඉඩක් පවතින බව ඔහු පැවසී ය.

වෙනත් රටවලින් ඇඟලුම් අපනයනය කිරීමේ ආර්ථික හැකියාවක් පවතින්නේ ඇමෙරිකාවට හා යුරෝපා සංගමයේ රටවලට පමණක් බැවින් මේ දක්වා මෙරට නිෂ්පාදිත ඇඟලුම් එම රටවලට පමණක් යැවූ බව කී ඔහු උද්ගතව ඇති තත්ත්වය හමුවේ අලුත් වෙළෙඳපොළවල් සොයා ගැනීමට නම් රජයේ මැදිහත්වීම අවශ්‍ය බව ද අවධාරණය කළේ ය.

ඇඟලුම් පරිභෝජනය අතින් ලොව දෙවැනි හා තෙවැනි ස්ථානවල පිළිවෙළින් චීනය සහ ඉන්දියාව පසුවන බවත් ඊට අමතරව ජපානය, දකුණු කොරියාව, බ්‍රසීලය, රුසියාව,‌ ඔස්ට්‍රේලියාව, කැනඩාව වැනි රටවලට මෙරට නිෂ්පාදිත ඇඟලුම් අපනයනය කිරීමේ හැකියාව පවතින බවත් කී උපසභාපතිවරයා මේ වෙළෙඳපොළවල් ආක්‍රමණය කිරීමට මෙතෙක් කිසිදු ක්‍රියාමාර්ග ගෙන නොමැති බවත් සඳහන් කළේ ය. 

යුරෝපා සංගමයෙන් ජී.එස්.පී. ප්ලස් සහනය ලැබුණ ද මෙරට නිෂ්පාදිත ඇඟලුම් වෙනුවෙන් භාවිත වන්නේ එයින් සියයට 50-55 ත් අතර ප්‍රතිශතයක් පමණක් බව කී ඔහු එම සංගමයේ රටවල් 28 ක් තිබුණ ද රටවල් 4 ක් හෝ 5 ක් වැනි සුළු ප්‍රමාණයකට පමණක් ශ්‍රී ලංකාවේ ඇඟලුම් අපනයනය කෙරෙන බව ද හෙළි කළේ ය.