ඉන්දික හේවාවිතාරණ

විදුලිබිඳ වැටීම් යථා තත්ත්වයට පත් කිරීමේදී අමුද්‍රව්‍ය හා ඉංජිනේරු හිඟය නිසා ගැටලු රැසක් ඇති වී තිබෙන බව විදුලිබල මණ්ඩල ඉංජිනේරු සංගමය සඳහන් කරයි. බිඳවැටීම් යථා තත්ත්වයට පත් කිරීම සඳහා ඉංජිනේරුවරුන්ට පවා සහභාගි වීමට සිදුව තිබෙන බවද එම සංගමයේ සභාපති ධනුෂ්ක පරාක්‍රමසිංහ මහතා සඳහන් කළේය.

ට්‍රාන්ස්පෝමර් කාර්මික දෝෂවලට ලක්වීමේදී අලු‍ත්වැඩියා කිරීමට අවශ්‍ය ඇතැම් උපකරණ හා විදුලි රැහැන්, විදුලිකණු හා සම්බන්ධ කරන උපාංගවල හිඟයක් පවතින බවද හෙතෙම පවසා සිටියේය. 
කේබල් වර්ගවලද හිඟයක් පවතින බවත්, ගෙවී ගිය මාස දෙකක කාලය සැලකීමේදී ඉංජිනේරුවන් 40ක් සේවය හැර ගොස් තිබෙන බවත්, මේ අනුව සමස්ත ඉංජිනේරුවන්ගේ හිඟය 190 දක්වා ඉහළ ගොස් තිබෙන බවත් ඒ මහතා පැවසීය.
මේ වසරේ  මාර්තු 15 වන විට ඉංජිනේරුවන් 150 ක හිඟයක් පැවතුණ බවත්, දැනට පවතින 190 ක හිඟයෙන් අතිබහුතරයක් විදුලි ඉංජිනේරුවන් බවත්, ඉතිරි පිරිස් යාන්ත්‍රික හා සිවිල් ඉංජිනේරුවන් බවත් සභාපතිවරයා පවසා සිටියේය. බිඳවැටීම් යථාතත්වයට පත් කිරීමේ ප්‍රමාදය නිසා විදුලි පාරිභෝගිකයන්ගෙන් විදුලිබල මණ්ඩලයට චෝදනා එල්ල වන බවත් ඒ මහතා පැවසීය.