ඉන්දික හේවාවිතාරණ
ඉදිකිරීම් ක්ෂේත්‍රයෙහි කම්කරුවන් සැලකිය යුතු පිරිසක් රැකියා සඳහා විදෙස් රටවලට යෑම සහ පෞද්ගලික ආරක්ෂක සේවය ඇතුළු වෙනත් රැකියාවලට යොමු වීම නිසා ඉදිරියේදී ඉදිකිරීම් ක්ෂේත්‍රයෙහි පුහුණු ශ්‍රමිකයන් නොමැති වීමේ ගැටලු‍වකට මුහුණ දීමට සිදුවන බව ජාතික ඉදිකිරිම් සේවක සංගමය සඳහන් කරයි. 

කොවිඩ් අර්බුදය පැමිණිමට පෙර ඉදිකිරීම් ක්ෂේත්‍රයෙහි පෙදරේරුවන්, වඩු බාස්වරුන්, තීන්ත අලේප කරන පිරිස් විදුලි කාර්මිකයන් හා ටයිල් බාස්වරුන් ඇතුළු ඉදිකිරීම් ක්ෂේත්‍රයට අදාළ පුහුණු සේවකයන්  ලක්ෂ හතක් පමණ රට තුළ සිටි බවද එම සංගමයේ සභාපති එස්. එම්. ජනේන්ද්‍රසිංහ සඳහන් කළේය. මෙම ක්ෂේත්‍රයේ පවතින අවනිශ්චිතතාව නිසා දැනට මාසික වැටුප් ලබන ක්ෂේත්‍රවල සිටින පිරිස් නැවත ඉදිකිරීම් කටයුතු සඳහා පැමිණීමේ උනන්දුවක් නොමැති බවද හෙතෙම සඳහන් කළේය. මේ නිසා ඉදිරියේදී රජයේ ඉදිකිරීම් කටයුතු සිදුකරන වැඩපිළිවෙළ යටතේ අලු‍තින් ඉදිකිරීම් සිදුකිරීමට සාපේක්ෂව රජයේ ගොඩනැගිලි අලු‍ත් වැඩියා කිරීමේ කටයුතු ආරම්භ කළ යුතු බව සභාපතිවරයා පැවසීය.
අලු‍ත්වැඩියා කටයුතු සඳහා සැලකිය යුතු සේවක පිරිසක් යොදා ගත හැකි බවද අඩු පිරිවැයකින් විශාල වැඩ කොටසක් සිදු කළ හැකි බවද ඒ මහතා පැවසීය. මේ වන විට ඉදිකිරීම් ක්ෂේත්‍රය ආශ්‍රිතව පුහුණු සේවකයන් සිටින්නේ ලක්ෂ දෙකත් තුනත් අතර ප්‍රමාණයක් බවත් ගෙවීගිය මස 06 ක පමණ කාලයක සිට ඉදිකිරීම් ක්ෂේත්‍රය යම් මට්මින් දියුණුවෙමින් තිබෙන බවත් හෙතෙම පැවසීය.
මීට පෙර පෙදරේරුවකු යටතේ යම් පිරිසක් පුහුණුව ලබාගත්තත්  මේ වන විට පුහුණු කටයුතු සඳහාද පිරිස් නොමැති වෙමින් තිබෙන නිසා  ඉදිකිරීම් ක්ෂේත්‍රය ස්ථිර රැකියා සිදුකිරීමට හැකි කර්මාන්තයක් බවට පත් කිරීම රජයේ වගකීමක් බව සංගමයේ සභාපති එස්. එම්. ජනේන්ද්‍රසිංහ පවසා සිටියේය.