ඉන්දික හේවාවිතාරණ
උසස් පෙළ විභාගය හෙට (25දා) සිට ලබන මස 20 වැනි දා දක්වා විභාග මධ්‍යස්ථාන 2312 කදී පැවැත් වේ. 
විභාග මධ්‍යස්ථානවලට ජංගම දුරකතන, අත්ඔරලෝසු හා විද්‍යුත් උපකරණ රැගෙන ඒම සපුරා තහනම් බව විභාග දෙපාර්තමේන්තුව සඳහන් කරයි. මෙවැනි වරදක් සිදු කළ හොත් වසර 05 ක් යන තුරු විභාග තහනම් කිරීමට කටයුතු කරන බවද විභාග කොමසාරිස් ජනරාල් අමිත් ජයසුන්දර මහතා සඳහන් කළේය.

විභාගය පැවැත්වෙන වෙලාවට මිනිත්තු 30 කටවත් පෙර විභාග මධ්‍යස්ථානවලට පැමිණෙන ලෙස ඉල්ලා සිටින ඔහු ප්‍රවේශ පත්‍රය හා හැඳුනුම්පත අනිවාර්‌යයෙන් රැගෙන ආ යුතු බව පැවසීය. යම් සිසු  දරුවකුට ආපදාවක් නිසා විභාගයට පෙනී සිටීමට බාධාකාරී තත්ත්වයක් පවතී නම් ආපදා කළමනාකරණ මධ්‍යස්ථානයේ හදිසි ඇමතුම් අංක 117 හෝ ආපදා කළමනාකරණ මධ්‍යස්ථාන විශේෂ ඒකාබද්ධ හදිසි මෙහෙයුම් මැදිරි අංක වන 0113 668020 / 0113 668100 / 0113668013 / 0113668010 සහ 076 3 117 117 යන අංක වෙත හෝ විභාග දෙපාර්තමේන්තු හදිසි ඇමතුම් අංක 1911  යන දුරකථන අංකයට දන්වන ලෙස ආපදා කළමනාකරණ මධ්‍යස්ථානය සඳහන් කරයි. 
ආපදා තත්ත්වයන් හේතුවෙන් ඇතිවිය හැකි බාධා මගහරවා ගනිමින් මෙවර උසස් පෙළ විභාගය පවත්වා ගෙනයාම සඳහා අවධානය යොමු කරමින් ආපදා කළමනාකරණ මධ්‍යස්ථානය සහ විභාග දෙපාර්තමේන්තුව එක්ව විශේෂ ඒකාබද්ධ වැඩසටහනක් ක්‍රියාත්මක කිරීමට සැලසුම් කර තිබේ. උසස් පෙළ විභාගය සඳහා අයැදුම්කරුවන් 333,185 දෙනෙකු පෙනී සිටීමට නියමිතය. අයැදුම්කරුවන් 253,390ක් පාසල් සිසුන් වන අතර පෞද්ගලික අයැදුම්කරුවන්ගේ ගණන 79,795කි. හෙට දින සිට ආරම්භ වන උසස් පෙළ විභාගයට අදාළ සියලු‍ ප්‍රවර්ධන කටයුතු මේ මස 19 මධ්‍යම රාත්‍රියේ සිට විභාගය අවසන් වන තෙක් තහනම් බව විභාග දෙපාර්තමේන්තුව සඳහන් කරයි. අදාළ නීති උල්ලංඝනය කරන  පුද්ගලයන් හෝ ආයතන තිබෙනවා නම් ඒ පිළිබඳව  0112421111 හෝ 119 අංක මගින් පොලිසියට දැනුම් දෙන ලෙසත් මීට අමතරව 1911 හෝ 0112784208, 0112784537දුරකතන අංක මගින්  විභාග දෙපාර්තමේන්තුවට දැනුම් දෙන ලෙසත් දෙපාර්තමේන්තුව ජනතාවගෙන් ඉල්ලා සිටියි.