- වෘත්තිය සමිති කියති

යොහාන් භාසුර

ඛනිජ තෙල් තොග ගබඩා පර්යන්ත සමාගම ඊආර්පී පරිගණක පද්ධතියක් හරහා ‘සැප්’ මෘදුකාංගයක් භාවිත කරමින් තොරතුරු දත්ත පවත්වාගෙන යන බවත්, එම දත්ත පද්ධතියේ ප්‍රධාන මෙහෙයුම් නිලධාරියා පසුගිය වසරේ සේවයෙන් ඉවත්ව යෑමේ සූදානමක් ද පැවැති බවත් තොග ගබඩා පර්යන්තයේ වෘත්තීය සමිති නියෝජිතයෙක් ’ලංකාදීප’යට පැවසීය. 

ලංකා ඛනිජ තෙල් තොග ගබඩා පර්යන්ත සමාගමේ පරිගණක තොරතුරැ දත්ත ලක්ෂ 13 ක් පමණ ප්‍රධාන පද්ධති යෙදුමෙන් මකා ඇතැයි වෝහාරික විගණනයකින් හෙළි වූ බව විදුලිබල හා බලශක්ති අමාත්‍ය කාංචන විජේසේකර මහතා පසුගිය බ්‍රහස්පතින්දා (15 වැනිදා) හෙළි කළ කරුණු සම්බන්ධයෙන් අප කළ සොයා බැලීමකදී මේ බව අනාවරණය විය. 
ඉන්ධන හිඟය හේතුවෙන් 2022 වසරේ රට තුළ ඉන්ධන අර්බුදය ඇති වූ සමයේ ඛනිජ තෙල් තොග ගබඩා පර්යන්තයෙන් රැපියල් කෝටි ගණනක් වටිනා ඉන්ධන බවුසර් හොර රහසේ පිට කළේ යැයි හෙළි වූ අතර එම සිද්ධිය සම්බන්ධයෙන් එම ආයතනය අභ්‍යන්තර පරීක්‍ෂණයක් ආරම්භ කළ ද පසු කාලයකදී එය යටගැසූ බවත් වෘත්තීය සමිති නියෝජිතයෝ කියති.

මෙම දත්ත මකා දැමීමේදී 2022 වසරේ ඉන්ධන අර්බුදය පැවැති කාලයේ බොහෝ තොරතුරැ මකා ඇති බවත්, බොහෝ ඉන්ධන සැපයුම්වලට අදාළ බිල්පත් සහ වාර්තා පරීක්‍ෂා කිරීමේදී ඒවා මකා ඇතැයි හෙළි වී ඇති බවත් වෘත්තීය සමිති කියයි. 

ඉන්ධන බවුසර් හොර රහසේ පිටකළේ යැයි කියන වංචාව එම පර්යන්තයේ හිටපු උසස්ම නිලධාරියෙක් සමඟ තොරතුරැ තාක්‍ෂණ අංශයේ නිලධාරීන් ඇතුළු කණ්ඩායමක් එකතුව කළ වංචාවක් බව කී එහි වෘත්තීය සමිති නියෝජිතයෙක් එයට සම්බන්ධ ඇතැමුන් මේ වන විටත් සේවය අතහැර ගොස් ඇති බව වැඩි දුරටත් සඳහන් කළේය. 
බලශක්ති අමාත්‍ය කංචන විජේසේකර මහතා 2022 වසරේ අපරාධ පරීක්ෂණ දෙපාර්තමේන්තුවට කළ පැමිණිල්ලට අනුව මෙම විගණනය කර ඇති අතර එම පැමිණිල්ල කිරීමෙන් පසුව 2023 වසර වන විට එම දත්ත මකා දැමීම් අඩුවී තිබේ.