මනෝප්‍රිය ගුණසේකර
මහර බන්ධනාගාරයේ රඳවා සිටි රැඳවියන් කළ විරෝධතාවකදී වෙඩි තබා 11 දෙනෙකුගේ මරණ සිදුකිරීමේ සිද්ධියට අදාළ නීතිපතිවරයාගේ ස්ථාවරය දැනුම්දීමට නොවැ. 22 වැනිදා අධිකරණයේ පෙනී සිටින ලෙස මියගිය රැඳවියන්ගේ ඥාතීන්ට හා රහස් පොලිස් නිලධාරීන්ට වැලිසර මහෙස්ත්‍රාත් තුසිත ධම්මික උඩිවවිදාන මහතා නියම කළේය.

වෙඩි තබා රැඳවියන් 11 දෙනෙකුගේ මරණ සිදු කළැයි කියන සිද්ධියට අදාළව ඉදිරි පියවර ගැනීමට අවශ්‍ය නොවන බවට අපරාධ පරීක්‍ෂණ දෙපාර්තමේන්තුවේ අධ්‍යක්‍ෂවරයාට දැනුම් දෙමින් සිද්ධියට අදාළව දෙපාර්තමේන්තුවේ පවත්වාගෙන ගිය ගොනුවද වසා දැමීමට නීතිපතිවරයා පියවර ගෙන ඇති බව මියගිය රැඳවියන්ගේ ඥාතීන් සහ රහස් පොලිස් නිලධාරීන් දැනුවත් කිරීම සඳහා අධිකරණයේ පෙනී සිටින ලෙස දැනුම් දෙමින් නොතිසි නිකුත් කර ඇත.
පසුගිය ‘කොවිඩ්’ සමයේ මහර බන්ධනාගාරයේ රඳවා සිටි රැඳවියන් පිරිසක් තමන්ට ‘කොරෝනා’ වයිරසය ආසාදනය වී ඇත්දැයි දැන ගැනීම සඳහා ‘කොවිඩ්’ පරීක්‍ෂණ කරන ලෙසත් ‘කොරෝනා’ වයිරසය ආසාදනය වී බන්ධගාරයේ සිටින රැඳවියන්ට ප්‍රතිකාර ලබාදෙන ලෙසත් ඉල්ලා 2020 නොවැම්බර් 29 වැනිදා කළ විරෝධතාවකදී කළ වෙඩි තැබීම් හේතූවෙන් රැඳවියන් 11 දෙනෙකු මියගොස් තිබිණ.
සිද්ධියට අදාළව කළ දීර්ඝ මහේස්ත්‍රත් පරීක්‍ෂණය අවසානයේ තීන්දුව ප්‍රකාශයට පත් කළ වැලිසර මහෙස්ත්‍රාත් තුසිත ධම්මික උඩිවවිදාන මරණකරැවන්ට වෙඩි වැදී ඇති ආකාරය අනුව කැරැල්ලක් මැඩ පැවැත්වීම සඳහා හෝ මානුෂීය මෙහෙයුමක් සඳහා වෙඩි තැබූ බවක් පෙනෙන්නට නැතැයිද මරණකරුවන්ට වෙඩි වැදී ඇති ආකාරය අනුව කළහකාරී අන්දමින් හැසිරුණු බව කියන රැඳවියන් විසුරුවා හැරීම සඳහා බන්ධනාගාර නිලධාරීන් වෙඩි තැබුවා දැයි සැක මතුවන්නේ යැයිද සඳහන් කර ඇත.

කැරැල්ල මැඩ පැවැත්වීම සඳහා ඔවුන්ගේ දණහිසින් පහළට වෙඩි තැබීමට අණ දුන් බවත් ඒ අනුව කළහකාරී අන්දමින් හැසිරුණු රැඳවියන්ගේ දණහිසින් පහළට වෙඩි තැබූ බවට සාක්කි ඉදිරිපත් වුවද මරණයට පත් වූ කිසිදු රැඳවියකුගේ දණහිසින් පහළට වෙඩි තැබූ බවට සලකුණු නොමැති බවට තීන්දු කළ මහේස්ත්‍රාත්වරයා මියගිය රැඳවියන් 11 දෙනාගේම මරණ සිදුවී ඇත්තේ ඔවුන්ගේ හිස” බඩ” පපුව ආදී ප්‍රදේශවලට වෙඩි වැදීමෙන් ඇතිවූ තුවාල හේතූවෙන් බවද මහේස්ත්‍රාත් පරීක්‍ෂණ තීන්දුවේ සඳහන් කර ඇත.
ඒ අනුව මෙම සිද්ධිය අපරාධයක් බව තීරණය කළ මහෙස්ත්‍රාත්වරයා අපරාධයට සම්බන්ධ සියලුම බන්ධනාගාර නිලධාරීන් වහාම අත්අඩංගුවට ගෙන අධිකරණයට ඉදිරිපත් කිරීමට රහස් පොලිසියට නියම කර තිබිණ.
එසේ නියම කර වසර 1 1/2ක කාලයක් ගතවී තිබුණත් මෙතෙක් කිසිදු සැකකරුවකු අත්අඩංගුවට ගෙන අධිකරණයකට ඉදිරිපත් කර නොමැතිව තිබියදී පසුගිය අගෝස්තු 30 වැනිදා නීතිපතිවරයා වෙනුවට අතරේක සොලිසිටර් ජනරාල් හරිපියා ජයසුන්දර මහත්මිගේ අත්සනින් යුතු ලිපියක් මඟින් අපරධ පරීක්‍ෂණ දෙපාර්තමේන්තුවේ අධ්‍යක්‍ෂවරයාට යොමු කරමින් සිද්ධියට අදාළව ඉදිරි පියවර ගැනීමට අවශ්‍ය නොවන බවද දෙපාර්තමේන්තුවේ පවත්වා ගෙන යන ගොනුව වසා දැමීමට පියවර ගන්නා බවද දැනුම් දී ඇත. සිද්ධියට අදාළ විමර්ශන උධෘත අධ්‍යයනය කිරීමේදී නිලධාරීන්ගේ සහ රුඳවින්ගේ පෞද්ගලික ආරක්‍ෂාව සඳහා පොලිස් විශේෂ කාර්ය බළකා නිලධාරීන් නීත්‍යනුකූලව කටයුතු කර ඇති බවත් නිලධාරීන් පෞද්ගලික ආරක්‍ෂාවේ අයිතිය ඉක්මවා ක්‍රියාකර නොමැති බව නීරීක්‍ෂණය කරන බවත් සඳහන් කරන නීතිපතිවරයා බන්ධනාගාර නිලධාරීන් බන්ධනාගාර පනතේ 77 වැනි වගන්තියට අනුකූලව ක්‍රියාකර ඇති බව අනාවරණය වන බවත් සඳහන් කර තිබිණ.
එසේ තිබියදී රැඳවියන් පාලනය කිරීම සඳහා වෙඩි තැබීමට යොදා ගත් බව කියමින් බන්ධනාගාර නිලධාරීන්ගෙන් ලබා ගෙන තිබු බව කියන ගිනි අවි 06ක් සහ පොලිස් විශේෂ බළකා නිලධාරීන්ගෙන් ලබා ගෙන තිබූ බව කියන ටී 56 වර්ගයේ ගිනි අවි 02ක් මුදා හරින ලෙස රහස් පොලිසිය කළ ඉල්ලීමක් පිළිගත් මහෙස්ත්‍රාත් තුසිත ධම්මික උඩිවවිදාන අදාළ ගිනි අවි බන්ධනාගාරයට සහ පොලිස් විශේෂ බළකායට මුදා හැරීමට නියම කළේය.
ඉන් අනතුරුව නීතිපතිවරයාගේ ස්ථාවරය දැනුම්දීමට නොවැම්බර් 22 වැනිදා අධිකරණයේ පෙනී සිටින ලෙස නියම කළ මහේස්ත්‍රාත්වරයා මියගිය රැඳවියන්ගේ ඥාතීන්ට හා රහස් පොලිස් නිලධාරීන්ට නොතිසි නිකුත් කළේය.