උපුල් වික්‍රමසිංහ
දැනට පවතින වැසි තත්ත්වයෙහි යම් අඩු වීමක් හෙට (12දා) සහ අනිද්දා (13දා) යන දින දෙකේදී අපේක්ෂා කළ හැකි වුවත් ලබන 15 වැනිදා දක්වා වැසි සහිත කාලගුණය පවතින බව කාලගුණ විද්‍යා දෙපාර්තමේන්තුවේ කාලගුණ විද්‍යා අධ්‍යක්ෂ අජිත් විජේමාන්න ඉරිදා ලංකාදීපයට පැවසීය.

ඒ අනුව බස්නාහිර, සබරගමුව, මධ්‍යම, දකුණ සහ වයඹ යන පළාත්වලට වැසි පතිත විය හැකි බව ද සවස් හා රාත්‍රී කාලවලදී දිවයින පුරා වැසි ඇති විය හැකි බව ද හෙතෙම සඳහන් කළේය.
බෙංගාල බොක්ක ප්‍රදේශයේ හටගෙන ඇති කැලඹිලිසහගත ස්වභාවය ලබන 15 වැනිදායින් පසු අඩු වෙතැයි අපේක්ෂා කරන බව කී කාලගුණ විද්‍යා අධ්‍යක්ෂවරයා ඒ අනුව එදින සිට වැසි තත්ත්වයේ අඩුවීමක් බලාපොරොත්තු වෙන බව ද ප්‍රකාශ කළේය. ඉකුත් 11 වැනිදා වැඩිම වර්ෂාපතනයක් හංවැල්ල ප්‍රදේශයෙන් වාර්තා වූ බවත් එය මිලි මීටර් 276 ක් බවත් ඔහු වැඩිදුරටත් කීවේය.
මේ අතර ආපදා කළමනාකරණ මධ්‍යස්ථානය පසුගිය 11 වැනිදා නිකුත් කොට තිබූ වාර්තාවක දැක්වුණේ පවතින අයහපත් කාලගුණය හේතුවෙන් එදින වෙන විට පවුල් 9,835 කට අයත් පුද්ගලයන් 31,006 දෙනකු පීඩාවට පත්ව සිටි බවය.
මේ අතර ඉකුත් 11 වැනිදා ජාතික ගොඩනැගිලි පර්යේෂණ ආයතනය නායයාමේ පූර්ව අනතුරු ඇඟවීමේ නිවේදනයක් නිකුත් කරමින් සඳහන් කළේ ගාල්ල, කළුතර, මාතර, කෑගල්ල, රත්නපුර, කොළඹ සහ ගම්පහ දිස්ත්‍රික්කවල වෙසෙන ජනතාව නායයෑම් සම්බන්ධයෙන් අවධානයෙන් (අනතුරු ඇඟවීමේ මට්ටම 2) පසු විය යුතු බවය.