මනෝප්‍රිය ගුණසේකර

නිරූපණ ශිල්පිනී පියුමි හංසමාලී නමැත්තිය විසින් නීති විරෝධී හා සැක කටයුතු අන්දමින් රුපියල් කෝටි ගණනක දේපළ උපයා ගත් බවට රහස් පොලිසියට පැමිණිලි කළ ‘මගෙන් රටට’ සංවිධානයේ සභාපති සංජය මහවත්ත මහතා සමාජ මාධ්‍ය ඔස්සේ රහස් පොලිසියට අසත්‍ය චෝදනා එල්ල කළේ යැයි කියමින් ලබන 05 වැනිදා දක්වා රිමාන්ඩ් බාරයට පත් කෙරිණ.

සාධාරණ හේතුවක් නොමැතිව නීතිය ක්‍රියාත්මක කරන පොලිස් නිලධාරීන්ට අසත්‍ය චෝදනා එල්ල කිරීම, පෙලිස් නිලධාරීන්ගේ කටයුතුවලට  බාධා කිරීම, සම්බන්ධයෙන් විමර්ශන කරන හෙයින් සැකකරුගේ ඇප ඉල්ලීම ප්‍රතික්ෂේප කළ කොළඹ ප්‍රධාන මහේස්ත්‍රාත් තිළිණ ගමගේ මහතා ඔහු රිමාන්ඩ් බාරයට පත් කළේය. නීතිය ක්‍රියාත්මක කරන  රහස් පොලිසියට හා එහි නිලධාරීන් අගෞරවයට හා වෛරයට පාත්‍ර වන ආකාරයේ ප්‍රකාශ නිකුත් කරන ලදැයිද, යමෙකුට පාඩු, අලාභ සිදු කිරීමේ චේතනාවෙන් බොරු චෝදනා එල්ල කරන ලදැයිද කියමින් රහස් පොලිසියේ ත්‍රස්ත මර්දන කොට්ඨාසය විසින් අත්අඩංගුවට ගනු ලැබූ සංජය මහවත්ත මහතා අධිකරණයට ඉදිරිපත් කළ අවස්ථාවේදී ඉදිරිපත් වූ කරුණු සැලකිල්ලට ගනිමින් මහේස්ත්‍රාත්වරයා ඔහු රිමාන්ඩ් බාරයට පත් කළේය.

සැකකාර සංජය මහවත්ත මහතා අධිකරණයට ඉදිරිපත් කළ රහස් පොලිස් නිලධාරීහු සිද්ධියට අදාළව කළ විමර්ශනවල ප්‍රගති වාර්තාවක් මඟින් අධිකරණයට දැනුම් දුන්හ.

නීතිය ක්‍රියාත්මක කරන පොලිස් නිලධාරීන්ට අසත්‍ය චෝදනා එල්ල කරන ලදැයිද, පෙලිස් නිලධාරීන්ගේ කටයුතුවලට  බාධා කරන ලදැයිද, කියමින් මෙලෙස රිමාන්ඩ් බරයට පත් කළ සංජය මහවත්ත මහතා පෙර අවස්ථාවකදී රහස් පොලිසියට කළ පැමිණිල්ලකට අනුව ආරම්භ කළ විමර්ශනවලදී නිරූපණ ශිල්පිනී පියුමි හංසමාලී නමැත්තිය නීති විරෝධී හා සැක කටයුතු අන්දමින් රුපියල් කෝටි ගණනක දේපළ උපයා ගත්තේ දැයි සෙවීම සඳහා රහස් පොලිස් නිලධාරීන් විසින් අධිකරණයෙන් ඇගේ බැංකු ගිණුම් 19ක් පිළිබඳ තොරතුරු රහස් පොලිසියට දීමට රාජ්‍ය බැංකු ඇතුළු බැංකු 08ක කළමනාකාරවරුන්ට නියම කෙරිණ.

හිටපු ජනපති ගෝඨාභය රාජපක්‍ෂ මහතා භාවිත කර විකුණා ගැනීමට නොහැකිව තිබූ රුපියල් කෝටි 08ක් වටිනා ‘රේන්ජ් රෝවර්’ වර්ගයේ මෝටර් රථයක් මිලදී ගැනීම ඇතුළුව පියුමි හංසමාලී නමැත්තිය මුදල් උපයා ගත් ආකාරය සම්බන්ධයෙන් විමර්ශනය කරන බව කියමින් රහස් පොලිසියේ නීති විරෝධී වත්කම් විමර්ශන කොට්ඨාසයේ නිලධාරීන් කළ ඉල්ලීමක් පිළිගනිමින් ඇගේ බැංකු ගිණුම් පිළිබඳ තොරතුරු දීමට බැංකුවල කළමනාකරුවන්ට නියම කෙරිණ.