දුලක්ෂි ලියනගේ
වසර 2019 පසු ශ්‍රී ලංකාවේ දළ දේශීය නිෂ්පාදිතයේ සිදු වී ඇති වැඩිම වර්ධන වේගය 2024 වසරේ තෙවැනි කාර්තුවේදී සිදු වී ඇති බවත් එය සංඛ්‍යාත්මකව සියයට 5.5ක ධනාත්මක අගයක් බවත් ශ්‍රී ජයවර්ධනපුර විශ්වවිද්‍යාලයේ ව්‍යාපාරික ආර්ථික විද්‍යා මහාචාර්ය ජනක් කුමාරසිංහ ‘ඉරිදා ලංකාදීප’යට පැවසීය. 

ජනලේඛන හා සංඛ්‍යාලේඛන දෙපාර්තමේන්තුව විසින් 2024 වර්ෂයේ තෙවැනි කාර්තුවට අදාළව නිකුත් කරනු ලැබ ඇති ජාතික ගිණුම් ඇස්තමේන්තුව පරිදි 2023 වර්ෂයේ තෙවැනි කාර්තුවේ ස්ථාවර මිල (2015 ගණන් යටතේ) අනුව ශ්‍රී ලංකාවේ දළ දේශීය නිෂ්පාදිතය රුපියල් මිලියන 2,987,544 ක් ලෙස වාර්තා වී තිබූ බවත් එය 2024 වර්ෂයේ තෙවැනි කාර්තුවේ දී රුපියල් මිලියන 3,151,941 ක් දක්වා ඉහළ ගොස් ඇති බවත් මහාචාර්යවරයා සඳහන් කළේය. 
ආර්ථිකයේ ප්‍රධාන ක්‍රියාකාරකම් ත්‍රිත්වය වන කෘෂිකර්මාන්ත, කර්මාන්ත සහ සේවා ආර්ථික කටයුතු 2024 වර්ෂයේ තෙවැනි කාර්තුවේ පවත්නා මිල ගණන් යටතේ දළ දේශීය නිෂ්පාදිතයට දක්වනු ලබන දායකත්වය පිළිවෙළින් සියයට 8.2 ක්, සියයට 27.3ක්, සියයට 55.5ක් වශයෙන් දැක්වෙන බව ද භාණ්ඩ හා සේවා මත අය කෙරෙන බදු 2024 වර්ෂයේ තෙවැනි කාර්තුවේ දළ දේශීය නිෂ්පාදිතයට දක්වනු ලබන දායකත්වය සියයට 8.9 ක් ලෙස එම වාර්තාවල සඳහන්ව ඇති බවද හෙතෙම ප්‍රකාශ කළේය. 
2024 වර්ෂයේ තෙවැනි කාර්තුවේදී කෘෂිකාර්මික ආර්ථික කටයුතුවල වර්ධනය සියයට 3.0 ක් ලෙසත්, කර්මාන්ත ආර්ථික කටයුතු සියයට 10.8 ලෙසත්, සේවා ආර්ථික කටයුතු සියයට 2.6 ක් වශයෙනුත් ධන වර්ධනයක් වාර්තා වී තිබෙන බව එම දත්තවලින් තහවුරු වේ. 
එහිදී කර්මාන්ත ආර්ථික කටයුතුවල වර්ධනය විශේෂ තැනක් ගන්නා අතර එය 2023 වර්ෂයේදී පැවතුණේ 0.7 ක පසුබෑමකය. එය 2024 තෙවැනි කාර්තුවේදී සියයට 10.8ක ධන අගයක් ගෙන ඇත.