උපුල් වික්‍රමසිංහ

සැප්තැම්බර් 21 වැනිදා පැවැත්වෙන ජනාධිපතිවරණය වාර්තා කිරීම සඳහා දිවයිනට පැමිණීමට අපේක්ෂා කරන විදේශ මාධ්‍යවේදීන්ට පවතින වීසා නිකුත් කිරීමේ ගැටලුව හේතුවෙන් රටට පැමිණීම දුෂ්කර වී ඇතැයි වාර්තාවෙයි. 

එක් එක් රටවල පිහිටි ශ්‍රී ලංකා තානාපති කාර්යාල හෝ මහ කොමසාරිස් කාර්යාලවලින් හෝ මෙරටට පැමි‌ණීම සඳහා වීසා (ව්‍යාපාරික) අයැදුම් කරන ලද විදේශ මාධ්‍යවේදීන්ගේ අදාළ ලියකියවිලි විදේශ කටයුතු අමාත්‍යාංශය විසින් ආගමන විගමන දෙපාර්තමේන්තුවට යොමු කරනු ලැබ ඇතත් එවැනි අයැදුම්පත්වලින් බොහොමයකට මේ දක්වා අනුමැතිය ලබා දී නැති බව වාර්තා වෙයි.

මේ හේතුවෙන් ඇතැම් විදේශ මාධ්‍යවේදීන් සංචාරක වීසාවලින් රටට පැමිණ පසුව ඒවා ව්‍යාපාරික වීසාවලට පරිවර්තනය කර ගැනීමට කටයුතු කළ ද එය ද අපහසු කටයුත්තක් වී ඇතැයි පැවසේ. එබැවින් ඔවුන්ට මාධ්‍ය කටයුතුවල නියැළීමට අවසරය ලැබෙන මාධ්‍ය හැඳුනුම්පත ලබා ගැනීමට නොහැකි වී ඇතැයි ද දැනගන්නට ඇත.

අප මේ සම්බන්ධයෙන් විදේශ කටයුතු අමාත්‍යාංශයේ ප්‍රකාශකයකුගෙන් කළ විමසීමකදී හෙතෙම සඳහන් කළේ ජනාධිපතිවරණය වාර්තා කිරීම සඳහා විදේශ මාධ්‍ය ආයතනවල මාධ්‍යවේදීන් කිහිපදෙනකුගේ අයැදුම්පත් ඒ ඒ රටවල පිහිටි ශ්‍රී ලංකා තානාපති කාර්යාල සහ මහ කොමසාරිස් කාර්යාලවලින් අමාත්‍යාංශයට ලැබුණු පසු ඒවා ආගමන සහ විගමන දෙපාර්තමේන්තුවට යොමු කළ ද ඒවායෙන් බොහොමයකට මේ දක්වා අනුමතය ලැබුණු බවක් දැනගන්නට නොමැති බවය.

අප මේ සම්බන්ධයෙන් විමසීමට ආගමන හා විගමන දෙපාර්තමේන්තුවේ ආගමන විගමන පාලක ජනරාල් හර්ෂ ඉලුක්පිටිය  දුරකතනය ඔස්සේ සම්බන්ධ කර ගැනීමට උත්සාහ කළ ද එය ව්‍යර්ථ විය.