ගෙවුණු අගහරුවාදා දින සමගි ජනබලවේගයේ පාර්ලිමේන්තු මන්ත්‍රීවරු, ඔවුන්ගේ කාර්යාලයේ සිට පාර්ලිමේන්තුව බලා පැමිණියේ, ට්‍රැක්ටර, පස් කපන යන්ත්‍ර, වෑන් සහ බස් ආදී රථවල නැගී ගෙනය. එය, ඉන්ධන මිල ඉතා වැඩි අගයකින් ඉහළ දමා තිබීම අරබයා ඔවුන් දැක්වූ විරෝධය විය.

මෙසේ වාහනවල ගමන් කිරීමෙන් ඔබ කරන්නේ ඉන්ධන නාස්තියක් නොවේදැයි? මාධ්‍යවේදියෙක්, සමගි ජනබලවේගයේ නායක සහ විපක්ෂ නායක සජිත් ප්‍රේමදාස මහතාගෙන් විමසා සිටියේය. ඒ හමුවේ අපහසුතාවයට පත්වූ ප්‍රේමදාස මහතා “මේ විරෝධතාවය කරන්නේ තේරුම් ගැනීමේ හැකියාවක් තියෙන ජනතාවට” යැයි ප්‍රතිචාර දැක්වූයේ කෝපයෙනි. 

එම මාධ්‍යවේදියා සේම වියවුලට පත්ව සිටි, සමගි ජනබලවේගයේ රටවටා සාමාජිකයෝ තවත් සිය ගණනක් වූහ. 
පාර්ලිමේන්තු මන්ත්‍රීවරුන් සාමාන්‍යයෙන් ගමනේ යෙදෙන ප්‍රාඩෝ හෝ පැජරෝ යන රථ අතහැර මෙවැනි විරෝධතාවක් කරන්නේ කුමකටදැයි මෙන්ම විපක්ෂය දියත් කරමින් සිටින අනෙක් විරෝධතා සම්බන්ධයෙන් ද ඔවුන්ට ගැටලු පැවතිණ. මෙවන් විරෝධතාවල පදනම කුමක්දැයි ඔවුහු විමසූහ.

සජිත්ගේ පියාණන් වන නැසීගිය රණසිංහ ප්‍රේමදාස මහතා පාර්ලිමේන්තුවේ සිටි සමයේ, 1973 වසරේ එවක රජය ඉන්ධන මිල ඉහළ දැමීමට එරෙහිව ඔවුන් දියත් කළ විරෝධතාවය මීට හාත්පසින්ම වෙනස් විය. එහිදී ඔවුහු, වෝඩ් පෙදෙසේ පිහිටි ජේ.ආර්.ජයවර්ධන මහතාගේ නිවසේ සිට ගාලු මුවදොර ආසන්නයේ පැරණි පාර්ලිමේන්තුව දක්වා ආවේ ගොනුන් අදින ලද ගැල්වල නැගී ගෙනය. 

වාර්තාකරුවෙක් ලෙස එම අවස්ථාව ආවරණය කිරීම ලියුම්කරුට පැවරී තිබුණු අතර, විශේෂත්වය වූයේ මෙම විරෝධතාවයට තේමාවක් - එනම් ඉන්ධන මිල ඉහළ ගොස් තිබීම හමුවේ ජනතාවට ගැල්වල නැගී ගමනේ යෙදීමට සිදුවනු ඇත යැයි, තිබීමය. 

සිනහවක් කැඳවූ අවස්ථා ද මෙම විරෝධතාවයේ නොතිබුණා නොවේ. 

ආයුර්වේද වෛද්‍යවරයකු මෙන්ම දේශපාලනයේ දීත් සැබෑ කටකාරයකු වූ ධර්මසේන ආටිගල මහතා එවක කැස්බෑවේ එක්සත් ජාතික පක්ෂ පාර්ලිමේන්තු මන්ත්‍රීවරයා ලෙස පත්ව සිටියේය. එවකට විපක්ෂ නායකවරයා ලෙස කටයුතු කළ ජේ. ආර්. ජයවර්ධන මහතා ගමන්ගත් කරත්තය දක්කාගෙන ගියේය ඔහුමය. 

එම කරත්තයට ගැටගසා තිබුණු ගවයාට ඔහු කොපමණ නම් කෙවිටෙන් තැලී ද, පයින් ගැසී ද, යත් එක් අවස්ථාවක එම ගවයා ගොම තලියක් පිටුපසට විද්දේ ආටිගල මහතා ඇඳ සිටි සුදු සරම කොළ පැහැයෙන් වෛවර්ණ කරවමිනි. මෙය සිදුවූයේ ගැල් පේළිය පාර්ලිමේන්තුවට පිවිසීමට පෙරය. 

තවත් අවස්ථාවක, ජයවර්ධන මහතාගේ ගෙවත්තේ ගසක ගැටගසා සිටි ගවයෙක් පැන ගියේය. එම සත්ත්වයා සොයා ඉහළ මට්ටමේ මෙහෙයුමක් පවා දියත් කිරීමට සිදුවිය. එනිසා, කලින් සැළසුම් කරගෙන සිටි වේලාවට විරෝධතාවය ආරම්භ කිරීමටත් බාධා පැමිණුනි.

ගම්මන්පිල විරෝධය

රථවාහන විරෝධතාවයට අමතරව සමගි ජනබලවේගය තවත් පියවර දෙකක් ගත්තේය. 
එකක් වූයේ බලශක්ති අමාත්‍ය උදය ගම්මන්පිල මහතාට එරෙහිව ඉදිරිපත් කළ විශ්වාසභංග යෝජනාවයි. 
“දැන් සැප” යැයි කියමනක් ජනගත කිරීම දෙවැන්න විය.

ඉන්ධන මිල ඉහළ දැමීම සමස්ත රජයම නියෝජනය වන තීරණයක් වන පසුබිමක, ඔවුන් උදය ගම්මන්පිල මහතාට පමණක් අවධානය යොමුකර තිබෙන්නේ ඇයි? කොටින්ම, තමා ඉන්ධන මිල ඉහළ දැමීමට පියවර ගත්තේ, ජනපති ගෝඨාභය රාජපක්ෂ, අගමැති මහින්ද රාජපක්ෂ සහ අමාත්‍ය නාමල් රාජපක්ෂ යන මහත්වරු එයට අනුමැතිය දුන්නායින් පසුව පමණක් යැයි ගම්මන්පිල මහතා පවසා තිබේ.

ඉන්ධන මිල ඉහළ දැමීමේ තීරණයට මුදල් අමාත්‍යවරයා ද, වන අගමැති මහින්ද රාජපක්ෂ මහතාත් අත්සන් තබා ඇතැයි ඔහු පැවසුවේ ය. 

එවැනි තත්ත්වයක, ප්‍රේමදාස මහතාගේ මෙම විරෝධය රජයේ වැදගත් පුද්ගලයින් ඉලක්ක නොකෙරෙන මෘදු විරෝධයක් ද? මෙසේ ගම්මන්පිල මහතාට පමණක් එරෙහිව විශ්වාසභංගයක් ගෙන ඒමත් සමග, රජය පරාජයට පත්වීම වළක්වා ගැනීමේ අරමුණින් පාලක සන්ධානයේ පාර්ලිමේන්තු මන්ත්‍රීවරු ගම්මන්පිල වටා එක්වනු ඇත.

ගම්මන්පිල මහතාම කියා තිබෙන පරිදි ඉන්ධන මිල වැඩි කිරීම ඔහුගේ තනි තීරණයක් නොවේ. මෙවන් පසුබිමක, ගම්මන්පිල මහතා, ඉන්ධන මිල වැඩිකිරීමට අමතරව පැවැති නොවැදගත් ගැටලු කිහිපයකම, විශේෂයෙන්ම බැසිල් රාජපක්ෂ මහතා වැනි අය කිහිපදෙනෙක් අපහසුතාවයට පත් කරවීමේ සමත් වූ ගැටළුවක පැටලිණ. 

මීට දින කිහිපයකට පෙර, සජිත් ප්‍රේමදාස මහතාගේ ඉල්ලීමකට අනුගත වෙමින්, සමගි ජනබලවේගයේ පාර්ලිමේන්තු කණ්ඩායම ඔහුට විශ්වාසපක්ෂ යෝජනාවකට පක්ෂව ඡන්දය පලකළේය. ඒ සම්බන්ධයෙන් මෙම තීරුවෙන් අනාවරණය කැරුණු ආකාරයට, ප්‍රේමදාස මහතා එවැනි යෝජනාවක් ගෙන ආවේ සිය පක්ෂයේ ඇතැම් සාමාජිකයන්ගේ ක්‍රියාකලාපය සම්බන්ධයෙන් ලැබුණු බුද්ධි වාර්තා පදනම් කරගෙනය. 

කරුණු මෙසේ හෙයින්, අනෙක් සියලුදෙනා පසෙකලා එක් අමාත්‍යවරයෙක්ට පමණක් දොස් පැවරීමට සමගි ජනබලවේගයේ සාමාජිකයන් එකගවූයේ ඇයි ද? යන්න පැහැදිලි නැත. එය හරියටම, බස් ගාස්තු ඉහළ නැංවීයැයි බස් කොන්දොස්තර මහතාට දොස් පවරනවා වැනිය.
අනෙක් කාරණය “දැන් සැපද?” යන කියමන වේ.
සමගි ජනබලවේගය එය ලබාගෙන තිබෙන්නේ මහින්ද රාජපක්ෂ මහතාගෙන්ය. 

එදවස එම කියමන රාජපක්ෂ මහතා යොදාගත්තේ, එවකට පැවැති යහපාලන රජයට ඡන්දය දී, අනෙක් පසට ඔවුන් පැනවූ දැඩි පියවර හමුවේ තැලී සිටි අයවලුන් සමච්චලයට ලක් කිරීමටය. රාජපක්ෂ මහතා, විවිධ වේදිකාවල දී, මෙය කීවේය. එම කියමන, අද සමගි ජනබලවේගයත් එළෙසම භාවිතා කරමින් සිටින්නේ, එක් බරපතල කාරණයක් අමතක කර දමාය. 

එම කියමනෙන් ඉලක්ක කැරෙන්නේ රජය නොවේ. රාජපක්ෂ මහතා කියා සිටි ලෙසම, එහි ඉලක්කය පොදු ජනතාවය. එය දැනටමත් තුවාළ ලැබ සිටින ඔවුන්ගේ එම තුවාළ මතට ලුණු දමනවා වැනි නොවේ ද? 
සමගි ජනබලවේගය ජනතාවගේ සිත් සතන් දිනාගැනීමට යන්නේ මේ ආකාරයට ද? 

විපක්ෂ නායකට ඖෂධ ඇමරිකාවෙන්

ප්‍රේමදාස මහතා කෝවිඩ්-19 වෛරසය ආසාදනයව ප්‍රතිකාර ලබමින් සිටි අවස්ථාවේ, ඔහුට අවැසි වූ ඖෂධ වහාම එක්සත් ජනපදයේ සිට ගෙන්වීමට පාලක සන්ධානය පියවර ගත්තේය. එයට හේතු අදාළ කරගැනීමට හෝ නොගැනීමට කෙනෙකුට හැකිය. එහි ප්‍රතිඵලයක් ලෙස ඔහු දැන් සුවය ලබා සිටී. අඩුම තරමින් පෞද්ගලික මට්ටමින් හෝ, ඒ සම්බන්ධයෙන් ඔහු පාලක සන්ධානයේ නායකයින්ට සහ අනෙක් අයට කෘතවේදීය. එය පෞද්ගලික මට්ටමින් වන කාරණයකි. අනෙක් අතට, සිය පාලක සන්ධානයේ නායකයින් සිය සුවදුක් විමසීම සම්බන්ධයෙනුත් ඔහු ඔවුන්ට සිය කෘතවේදීත්වය පළකර තිබේ.

එක්සත් ජාතික පක්ෂ නායක සහ හිටපු අගමැති රනිල් වික්‍රමසිංහ මහතා නැවත වරක් පාර්ලිමේන්තුවට පැමිණෙන්නේ මෙවන් පසුබිමක වීම අතිශයින් වැදගත්ය. 

ගෙවුණු පාර්ලිමේන්තු මැතිවරණයේ දී, එක්සත් ජාතික පක්ෂය රටේ දේශපාලන සිතියමෙන් අතුගෑවී ගිය බව සත්‍යයකි. ප්‍රකාශිත සමස්ත ඡන්දවලින් ඔවුන්ට දිනාගත හැකිවූයේ 2% ක පමණ ඡන්ද ප්‍රමාණයක් යන්නත් සත්‍යයකි. 

වික්‍රමසිංහ මහතාට ඔහු එතෙක් දැරූ පාර්ලිමේන්තු අසුනත් අහිමිව ගිය බවත් සත්‍යයකි. නමුත්, එක්සත් ජාතික පක්ෂයට හිමිව තිබූ එකම බෝනස් අසුනේ, පසුගිය බදාදා පාර්ලිමේන්තු මන්ත්‍රීවරයෙක් ලෙස දිව්රුම්දීමෙන් තමන් විවිධ හේතු කාරණා ගණනාවක් සම්බන්ධයෙන් මැදිහත් මෙහෙයක් ඉටුකිරීම අරබයා ඉතා වැදගත් පුද්ගලයෙක් බව ඔහු පෙන්වා දුන්නේ ය. 

එහිලා එක් කාරණයක් ලෙස, පාර්ලිමේන්තු මන්ත්‍රීවරයෙක් ලෙස දිව්රුම්දීමෙන් පසුව ඔහු කළ මංගල පාර්ලිමේන්තු කතාව පෙන්වා දිය හැකිය. එම කතාවේ දී, ඔහු හෝ සමගි ජනබලවේගය හෝ මින් පෙර අවස්ථාවක පෙන්වා නොදුන් කරුණු කාරණා රාශියක් වික්‍රමසිංහ මහතා මතුකළේය. කොටින්ම, ඔහුගේ එදිරිවාදීහු පවා ඒ හමුවේ මවිතයට පත්වූහ.  

ද සන්ඩේ ටයිම්ස් අනුග්‍රහයෙනි
පරිවර්තනය කෝවිද ගුණසේකර