(කාංචන කුමාර ආරියදාස)

මගේ කිරි එළදෙනුන්ට පින්සිද්ධ වෙන්න මුළු ලෝකයම පරදවා අපේ රටට රන් පදක්කම ගෙනෙන්න මගේ දුවට හැකි වුණා යැයි උස්බෙකිස්තානයේ පැවැත්වෙන ලෝක ශූරතා සහ පොදු රාජ්‍ය මණ්ඩල බර ඉසිලීමේ තරගයේ දී කාන්තා කිලෝ ග්‍රෑම් 45ට අඩු බර පන්තියේ රන් පදක්කම දිනාගත් ශ්‍රීමාලි සමරකෝන් ක්‍රීඩිකාවගේ මව ආර්.එම්.ඩබ්ලිව්. සුනේත්‍රා කුමාරිහාමි මහත්මිය පැවැසුවාය. 

උස්බෙකිස්තානයේ පැවැත්වෙන ලෝක ශූරතා සහ පොදු රාජ්‍ය මණ්ඩල බර ඉසිලීමේ තරගාවලියේ දී දී කාන්තා කිලෝග්‍රෑම් 45ට අඩු බර පන්තියේ රන් පදක්කම හිමිකර ගත් ශ්‍රීමාලි සමරකෝන් ක්‍රීඩිකාවගේ මව පියා සහ නිවෙස සොයා අප හබරණ තිබලව නිවෙසට ගිය අවස්ථාවේ දී මව එසේ කීවාය.

 මේ වන විටත් උස්බෙකිස්තානය සිටින ශ්‍රීමාලි සමරකෝන් රන් පදක්කම්ලාභී ක්‍රීඩිකාවගේ මව සහ පියා කිරි ගවයන්ගෙන් ජීවිතය ගැටගසා ගන්නා පවුලකි. 

ඔවුන් දඹුල්ල ප්‍රාදේශීය ලේකම් කොට්ඨාසයත් පලු‍ගස්වැව ප්‍රාදේශීය ලේකම් කොට්ඨාසයත් අතර පිහිටි තිඹලව නමැති ග්‍රාමයේ පදිංචිව සිටිති. තම දියණියගේ ජයග්‍රහණය පිළිබඳව ප්‍රවෘත්ති නාළිකාවලින් දැන ගත් බව දෙමාපියෝ කියති.

අප එම නිවෙසට යන විට ශ්‍රීමාලි සමරකෝන් ක්‍රීඩිකාවගේ පියා සමරකෝන් (55) මහතාත් ආර්.එම්.ඩබ්ලිව්. සුනේත්‍රා කුමාරි (53) කිරි ගවයන්ගේ කටයුතුවල නිරතව සිටින අයුරු දැක ගැනීමට හැකි විය.

අතේ ඇති ගොම ඇඳිවතින් පිහදා ගත් සුනේත්‍රා කුමාරි අප සමග කියා සිටියේ කුඩා අවධියේ සිට තම දියණිය බර ඉසිලීමේ ක්‍රීඩාවට දක්ෂතා දක්වා මෙම තරගාවලියේ දී 2015 දී රිදී පදක්කම ලංකාවට ලබාදුන් බවය. කුඩා අවධියේ සිට මේ දක්වා තම දියණියට ඉගැන්වීම් සඳහා අනේක දුක් කරදර විඳිමින් සිටින බව ඇය අප සමග පැවැසුවාය.

මේ වන විටත් තම කුඹුරක් උගසට තබා කිරි ගවයන් දෙදෙනකු මිලදී ගෙන තම දියණියටත් කුඩා දියණියටත් ඉගැන්වීම් කටයුතු සිදු කරන බව ද තම දියණිය බර ඉසිලීම් සිදුකොට රන් පදක්කම ලබාගත් ගෞරවය සතුට සියල්ල මෙම කිරි දෙනුන්ට අත්වන බවත් එම මව නිරහංකාරයෙන් යුතුව පැවසුවාය.

මෙම දැරිය හත්වැනි වසරේ අධ්‍යාපනය ලබද්දී හබරණ පාසලේ දී ලැබූ ජයග්‍රහණ පිළිබඳවත් ඇය දැඩි ආර්ථික දුෂ්කරතා සහිතව බර ඉසිලීමේ කටයුතු සිදු කරද්දී එකල විවිධ අයගේ උදව් උපකාර ලබා දී තිබෙන බවත් ඇය වැඩිදුරටත් සඳහන් කළාය.

ශ්‍රීමාලි සමරකෝන් ක්‍රීඩිකාවගේ මව ආර්.එම්.ඩබ්ලිව්. සුනේත්‍රා කුමාරිහාමි (53) මහත්මිය මෙසේ ද කීවාය.

‘‘අපේ දුව ලැබූ ජයග්‍රහණය සතුටුයි. හැබැයි මම කියන්නේ මේ ජයග්‍රහණයේ තමයි මගේ කිරි එළදෙන්නු මේ කිරි අම්මාලාට පින්සිද්ද වෙන්න තමයි මුළු ලෝකෙන් රටටම රන් පදක්කම ගේන්න පුළුවන් වුණේ. අදටත් මම මහත්තයත් එක්ක කිරි හරක් ටික බලන්නේ මෙයාගේ කටයුතු සහ ක්‍රීඩා කටයුතුවලට අවශ්‍ය මුදල් හොයන්න.’’

ගොවිතැන් කළ එකෙන් වැඩේ කරන්න බැරි වුණා. අපේ ලොකු පුතා කිව්වා ගොවිතැන් කරලා නංගි මේ තැන්වලට යවන්න බැහැ කුඹුර උගස් තියලා කිරි හරක් දෙන්නෙක් අරගමු කියලා. ඒ අනුව රුපියල් ලක්ෂ තුනකට අපි කුඹුර උගස් තිබ්බා. කිරි හරක් ටිකක් ගෙනල්ල එයාලගෙන් ගන්න මුදල තමයි වියදම් කළේ. දුවට මෙතැනට එන්න මං අදටත් සතුටු වෙන්නේ මේ කිරි අම්මලා අපේ දුවට විතරක් නෙවෙයි රටටම ආඩම්බරයක් වුණු නිසා’’ පසුගිය කාලයේ තරගවලට ඉදිරිපත් වෙන්න ඕනෑ වුණාම අපේ ගමේ බොහෝ දෙනකු මුදලින් උපකාර කළා. ඒ වගේම තමයි මම ආර්ථික මධ්‍යස්ථානයේ වගේම වෙළෙඳසල් ගානේ ගිහිල්ලා දුවට සල්ලි එකතු කරල දුන්නා. අම්මා කෙනෙක් හැටියට මට කරන්න පුළුවන් හැම කටයුත්තක්ම කළා. දුප්පත්කම කියන එක හැමෝටම තියෙනවා හැබැයි අපි කොහොම හරි රට වෙනුවෙන් අපේ යුතුකම් ඉටුකළා. දුව ජයග්‍රහණය ලැබුවා කියලා රූපවාහිනියෙන් දකින කොට පුදුමාකාර සතුටක් ලැබුවා.

‘‘අපේ ගෙදර මහත්තයත් හෘදයාබාධයකින් පෙළෙනවා. මම අවුරුදු ගණනාවක් තිස්සේ ගොවිතැන් කරලා උදේ හවස දැන් කිරි හරකුන්ට තණකොළ කපලා තමයි ජීවත් වෙන්නේ කොහොම හරි දුවව රටේ තැනකට ගේන්න අපට හැකි වුණා. සල්ලි නැතත් ඒ ආඩම්බරය තියනවා. ඒ වගේම දුව ඉගෙන ගත්ත මහමායා විද්‍යාලෙ ගුරුවරුන් දුවගේ ක්‍රීඩා උපදේශක ගුරුතුමා හබරණ ඉසුරු පාසලේ ගුරුවරුන් ගොඩක් අපට උදව් උපකාර කළා.’’

‘‘පුංචි කාලේ දුව බර උසුලන ක්‍රීඩාවට ඇතුළු වෙලා එද්දී යාට සපත්තු දෙකක්වත් තිබුණේ නැහැ. ඒව වගේම විවිධ ජයග්‍රහණ ලබන කොට ගුරුතුමා එයා දිරිමත් කළා. අපට කවදාවත් අමතක කරන්න බැහැ. 2103 වසරේ දුව ලැබූ ජයග්‍රහණයක් සමග මේ රටේ ජනමාධ්‍ය ආයතන ගොඩක් දුව ගැන ප්‍රවෘත්ති පළකරලා තිබුණා. ඒ අනුව බොහෝ දෙනෙක් දුවටත් පාසලටත් බර ඉසිලීමේ ක්‍රීඩාව ඉහළ නංවන්න උදව් උපකාර කළා. ඒ මාධ්‍යවේදීන් අපි සිහිපත් කරන්නේ පුදුමාකාර සතුටකින්.’’

ශ්‍රීමාලි සමරකෝන් ක්‍රීඩිකාව ගේ පියා ඩී.එම්. සමරකෝන් මහතා කියා සිටියේ තම දියණියගේ ජයග්‍රහණය පිළිබඳව සතුටු වන බවත් එමෙන්ම තම දියණියගේ ක්‍රීඩා ගුරුවරයා වූ නදීක බණ්ඩාර මහතා නිසා මෙම සියලු ජයග්‍රහණ ලැබුණු බවය. තම දියණියත් කුඩා අවදියේ සිට එම ගුරුවරයා රැකබලා ගනිමින් සිටි බව හෙතෙම සඳහන් කළේය.

ලංකාව රනින් සැරසූ ශ්‍රීමාලි සමරකෝන් හබරණ මහා විද්‍යාලයෙන් අධ්‍යාපනය සහ බර ඉසිලීමේ ක්‍රීඩාවට යොමුවී පසුව උසස් අධ්‍යාපනය සඳහා මහනුවර මහමායා බාලිකා විදුහලට ඇතුළත් වී මේ වනවිට ජයවර්ධනපුර විශ්වවිද්‍යාලයේ අධ්‍යාපනය ලබන්නීය.

දැඩි ආර්ථික දුෂ්කරතා මධ්‍යයේ අධ්‍යාපනය ලැබූ මෙම සිසුවිය කුඩා අවධියේ ලැබූ ජයග්‍රහණ සහ එකල අප වාර්තා කළ වීඩියෝ දර්ශනද තවමත් ඇය සතුව තබා ගෙන සිටීම ද විශේෂත්වයකි.

 අප මේ නිවෙසට යද්දී තම මිනිබිරියගේ ජයග්‍රහණයට 110 හැවිරිදි කිරි අම්මා සුබ පැතුම් එක් කළාය. ශ්‍රී මාලී සමරකෝන් දැරියගේ දහම් පාසල් ගුරුවරයා වූ නන්දන සෙනවිරත්න මහතා ජයග්‍රහණය ලද විගස උදෑසන එම නිවෙසට පැමිණ සිටියේය. දහම් පාසල් ගුරුවරයා කියා සිටියේ ආර්ථික දුෂ්කරතා සහිතව මෙම ගම්මානයේ ජීවත් වන අසරණ පවුලක දියණියක් ලෝකය ජය ගන්නට දැඩි වෙහෙසක් දැරූ බවය.

එමෙන්ම ජයග්‍රහණය ලබා ගත්තාට පසුව ඇය ඔසවා තබනවාට වඩා ජයග්‍රහණ ලබා ගැනීම සඳහා උදව් පදව් කිරීම රජයේ වගකීම බවය. ලංකාවේ රනින් සරසන්නට මෙම මව සහ ප්‍රදේශවාසීන් නගර පුරා ඇවිද මුදල් එකතු කරමින් අධ්‍යාපන කටයුතු ක්‍රීඩා කටයුතුවලට යොමු කළ බව ද හෙතෙම දැඩි සංවේදීව පැවසීය.

අප එම නිවෙසේ සිටම ශ්‍රීමාලි සමරකෝන් ක්‍රීඩිකාව මාර්ගත ඔස්සේ සම්බන්ධ කරගෙන ලැබූ ජයග්‍රහණයේ සතුට විමසූ අතර ඇය කියා සිටියේ තමන් සහ පුහුණු ගුරුවරයා වූ නදීක බණ්ඩාර මහතා දැඩි විශ්වාසයකින් සිටි බවය.
 මව් රට රනින් බැබළ වූ බර ඉසිලීමේ ක්‍රීඩිකාව වන ශ්‍රීමාලි සමරකෝන් දැරියගේ පියා වන ඩී.එන්. සමරකෝන් (55) මහතා තම දියණියගේ ජයග්‍රහණය පිළිබඳව මෙසේ පැවසීය. 

මට ගොඩක් සතුටුයි දුව මේ තැනට ආපු එක ගැන. අපි ගොඩක් බලාපොරොත්තු තියාගෙන තමයි හිටියෙ හැබැයි රන් පදක්කම ලැබෙයි කියලා බලාපොරොත්තුවක් තිබුණේ නැහැ. කොහොම වුණත් 2015 වසරේ දුව රිදී පදක්කම මේ තරගයෙන් ගෙනාපු නිසා අපට විශ්වාසයකුත් තිබුණා.”‍

 ‘‘මම ගොඩක් සතුටු වෙනවා දුවට ලැබුණු ක්‍රීඩා ගුරුතුමා ගැන නදීක බණ්ඩාර සර් තමයි දුවට මෙතෙන්ට එන්න බොහෝ උදව් උපකාර කළේ. එයාගේ පවුලේ සාමාජිකයකු හා සමානව මගේ දුවට උදව් උපකාර කළා. ඒ වගේම පුංචි කාලේ ඉඳලා අපි දුවගේ දස්කම් දැක්කා. ඒ නිසා විශාල කැප කැපකිරීම් මටත් අම්මටත් කරන්න සිද්ධ වුණා.”‍
‘‘ඇතැම් දවස්වල ක්‍රීඩා උත්සවවලට තරගවලට සහභාගි වෙන්න සල්ලි නැති වුණාම මම රට හැම තැනම ණය වුණා ඒ වගේම කුඹුරු ඉඩකඩම් පවා උකස් තියලා තියෙනවා.”‍

‘‘මගේ දුව රන් පදක්කම දිනුවා කියලා දැනගත්තේ එයා පොඩි දෝණිට එවල තිබුණ පණිවිඩයකින්. ඒ වගේම අපි ප්‍රවෘත්ති බලනකොට තමයි දැනගත්තේ හැබැයි ක්‍රීඩා අමාත්‍යංශ හෝ වෙනත් කවුරුත් අපට දැනුවත් කළෙත් නෑ. කොහොමහරි අපේ බලාපොරොත්තු ඉටු වුණා.

ඒ බලාපොරොත්තුව තමයි දෝණි රන් පදක්කමක් ලංකාවට ලබා ගැනීමට තියෙන කැමැත්ත. ඒ සඳහා වසර ගණනාවක් අපි මහන්සි වුණා. අද මම හෘද රෝගියෙක් බවට පත්වෙලා හරියට වැඩක් පලක් කරගන්න විදිහක් නෑ අපි ගොඩක් අමාරුවෙන් තමයි ජීවත් වෙන්නේ කොහොමහරි එයාගේ ඉදිරි අනාගතය සාර්ථක කර ගන්න තමයි අපට අවශ්‍යතාව තියෙන්නෙ.”‍

 ශ්‍රීමාලී සමරකෝන් ක්‍රීඩිකාවගේ දහම් පාසල් ගුරුවරයා වූ නන්දන සෙනවිරත්න මහතා මෙසේ කීය.

 ශ්‍රීමාලි රන් පදක්කම දිනපු දවස අමතක නොවන දවසක්. මොකද මට එදා දුවෙක් ලැබුණා ඒ වගේම මේ දුව රන් පදක්කම දිනුවා. ඒ සතුට දෙකම එකක් වගේ තමයි මට දැනෙන්නේ. මොකද අපි පුංචි දවසේ ඉඳලා මේ කෙල්ල දක්වන දක්ෂතා දැක්කා. අපි ගමේ ගිහිල්ලා ගෙවල් ගානේ ගිහිල්ලා මුදල් එකතු කරලා දුන්නා මේ දුවට ක්‍රීඩාවට අවශ්‍ය පහසුකම් සපයා ගන්න.”‍ යැයි පැවැසීය.