පොළොන්නරුව සංචාරක හෝටලයක අපවිත්‍ර ජලය නළයක් මගින් තෙප්පන් ඇළට බැහැර කිරීමේ චෝදනාවට වරද පිළිගත් එම හෝටලයේ කළමනාකාරවරයාට රුපියල් 75,000ක දඩයක් පොළොන්නරුව මහේස්ත්‍රාත් යූ.ඒ.කේ. වික්‍රමරත්න මහතා නියම කළ බව අප පුවත්පත ඉකුත්දා වාර්තා කළේය.

සංවර්ධනය නියත වශයෙන්ම පරිසර හිතකාමී විය යුතුය. පරිසරය නොතකා කටයුතු කිරීම නිසා මානව සංහතියට බරපතළ ලෙස වන්දි ගෙවීමට සිදු වී තිබේ.

කොරෝනා මාරාන්තික වයිරසයත් සමග තිරසර සංවර්ධනය හෙවත් පරිසර හිතකාමී සංවර්ධනය සම්බන්ධයෙන් ප්‍රබල අවධානයක් යොමු විය. මෙතරම්ම ඉක්මනට එම උගත් පාඩම් අමතක කිරීම බරපතළ ඛේදවාචකයකි.

චෝදනාවට ලක්වූ සංචාරක හෝටලයේ නාන තටාකයේ අපවිත්‍ර ජලය හා විසිතුරු මාළු ටැංකිවලින් ඉවත් කරන කළු පැහැති අපවිත්‍ර ජලය භූගත නළයක් මගින් පොළොන්නරුව පරාක්‍රම සමුද්‍රයට සම්බන්ධ ජලය බෙදාහරින තෙප්පන් ඇළට බැහැර කිරීමක් සම්බන්ධයෙන් සැකකරු චෝදනා පහක් යටතේ පොළොන්නරුව වනජීවී කාර්යාලයේ වන සත්ව අඩවි කාර්යාල නිලධාරීන් විසින් අත්අඩංගුවට ගෙන, අධිකරණයට ඉදිරිපත් කළ බව අප ප්‍රවෘත්තියෙහි සඳහන්ය. හෝටලයේ සේවකයන් දෛනිකව මෙය සිදුකර ඇති බවත්, එම වරද පිළිගන්නා බවත් ප්‍රකාශ කර ඇති සැකකරු, එම වැරැදි සේවකයන්ගෙන් නැවත සිදු නොවන බවට අධිකරණයේදී පොරොන්දු වූ බව ද අප ප්‍රවෘත්තිය වැඩිදුරටත් වාර්තා කර තිබිණි.

පොළොන්නරුව වනජීවී කාර්යාලයේ වන සත්ව අඩවි කාර්යාලයේ නිලධාරීන්ට ප්‍රණාමය පිරිනැමිය යුතුය. වරද සැඟවීමට සල්ලි මලු පිටින් විසි කරන සමාජයක, මෙහිදීත් එවැන්නක් සිදු නොවී තිබීමට හේතුවක් නැත. එමෙන්ම, යම් යම් බල අධිකාරීන්හි බලපෑම් එල්ල නොවුණේ යැයි කිව නොහැකිය. එහෙත්, ඒවාට යටත් නොවී, බලපුළුවන්කාරකම්වලට යට නොවී, තරාතිරම නොබලා නීතිය ක්‍රියාත්මක කළ එම නිලධාරීන් සියලු අංශවලට අගනා ආදර්ශයක් සපයා ඇත.

අදාළ සංචාරක හෝටලයේ කළමනාකාරවරයා වරද පිළිගත් බවත්, නැවත එම වැරැද්ද සිදු නොකරන බවට අධිකරණය ඉදිරියේ පොරොන්දු වූ බවත් අප ප්‍රවෘත්තියේ සඳහන්ය. වරද පිළිගැනීම මෙන්ම එම වැරැද්ද නැවත සිදු නොකිරීමට පොරොන්දු වීම ඉතා අගනේය. එහෙත්, එම වැරැද්ද සිදු නොකර සිටියේ නම් ඊටත් වඩා වැදගත්ය.

නාන තටාකයේ අපවිත්‍ර ජලය හා විසිතුරු මාළු ටැංකිවල කළු පැහැති අපවිත්‍ර ජලය තෙප්පන් ඇළට මුදාහැරීම අත්වැරැද්දක් විය නොහැකිය. සැකකාර කළමනාකාරවරයා එම වැරැද්ද සේවකයන් අතින් දෛනිකව සිදුවන බව ද පිළිගෙන තිබේ. මෙම බරපතළ පරිසර විනාශය දැන දැනම සිදුකර තිබේ. එය ඉතා බරපතළ තත්ත්වයකි.

ධනය ඉපැයිය යුත්තේ සාධාරණවය. මහා පරිසර විනාශයක් කරමින් ධනය ඉපැයීම බරපතළ වරදකි. පරාක්‍රම සමුද්‍රයට සම්බන්ධ ජලය බෙදාහරින තෙප්පන් ඇළට අපවිත්‍ර ජලය මුදාහැරීමෙන් සිදුවන පරිසර විනාශය ගණනය කළ නොහැකිය. ජනතාවගේ දෛනික අවශ්‍යතා සපුරාගනු ලබන්නේත්, ගොවිතැන සඳහා ප්‍රයෝජනයට ගනු ලබන්නේත් මෙම ජල කඳය.

එහෙයින්, එම ජල කඳට අපවිත්‍ර ජලය මුදාහැරීම දැන දැනම සිදුකර තිබීමෙන් පැහැදිලි වන්නේ, පරිසර සංරක්ෂණය සම්බන්ධයෙන් මෙන්ම රටේ නීතිය සම්බන්ධයෙන් කිසිදු අවධානයක් යොමු කර නැති බවය. මෙබඳු වැරැදි රටේ බොහෝ තැන්හි සිදු වෙයි. එබන්දක් මෙල්ල කළ හැකි වන්නේ, නීතියේ විධානය ක්‍රියාත්මක කිරීමෙන් පමණි.

(***)