අධිකරණයට අපහාස කිරීමට එරෙහි නෛතික කි‍්‍රයා මාර්ගවලින් නව අගමැතිවරයා සහ ජ්‍යෙෂ්ඨ ඇමැතිවරුන් බැහැර කිරීම සඳහා නව පනත් කෙටුම්පතක් ඊයේ (10) පාකිස්තාන පාර්ලිමේන්තුවේදී සම්මත කර ගැනිණි. පනත් කෙටුම්පත සම්මත කර ගැනීමේ ප‍්‍රධාන අරමුණ වී ඇත්තේ මීට සති කිහිපයකට පෙර පාකිස්තානයේ නව අගමැති ලෙස තේරී පත් වූ රාජා පර්වේස් අෂ්රාෆ්ට සිය ධුරය අහිමි වීම වැළැක්වීමය. පර්වේස් අෂ්රාෆ් අගමැති ධුරයට පත් වූයේ ඔහුට පෙර එම ධුරයේ සිටි යූසොෆ් රාසා ගිලානී ශ්‍රේෂ්ඨාධිකරණයට අපහාස කළේ යැයි වරදකරුවකු වීමෙන්  අගමැති ධුරය අහිමි වූ නිසාය. ගිලානි වරදකරු වූයේ පාකිස්තාන ජනාධිපති අසීෆ් අලී සර්දාරිට එරෙහිව ඇති දූෂණ නඩු විභාග යළි ආරම්භ කරන්නැයි ස්විට්සර්ලන්ත රජයට දැනුම් දෙන ලෙස ශ්‍රේෂ්ඨාධිකරණය කළ නියෝගයක් නොසලකා හැරීම හේතුවෙනි. නව අගමැති ලෙස අෂ්රාෆ් රාජකාරි ආරම්භ කළ අවස්ථාවේදී ශ්‍රේෂ්ඨාධිකරණය ඔහුට දැනුම් දුන්නේ ජනපති සර්දාරිට එරෙහිව එම නඩු විභාග යළි ආරම්භ කරන්නැයි ස්විට්සර්ලන්ත රජයට දැනුම් දෙන ලෙසටය. ඒ සඳහා සති දෙකක කාලයක් ද ලබා දුන්නේය. එම කාලසීමාව අදින් (11)  අවසන් වේ. ශ්‍රේෂ්ඨාධිකරණයේ නියෝගයට ප‍්‍රතිචාර දක්වමින් අගමැති අෂ්රාෆ් පවසා ඇත්තේ සර්දාරිට එරෙහිව නඩු පැවැරීමට හැකි වන්නේ ඔහු ජනපති ධුරයෙන් ඉවත් ව ගියාට පසු බවය. ජනපති ධුරයේ සිටිද්දී සර්දාරිට එරෙහිව නීති මගින් කි‍්‍රයා කිරීමට නොහැකි බව ද අගමැති අෂ්රාෆ් වැඩිදුරටත් කියා තිබේ.