ඒකපාර්ශවීය තීරණයක් ගනිමින් එක්සත් ජාතීන්ගේ සංවිධානය ඉරානයට පනවා තිබූ සම්බාධක නැවත පැනවීමට ඇමෙරිකා එක්සත් ජනපදය පියවර ගෙන ඇත.
 
එක්සත් ජාතීන්ගේ ආරක්ෂක කවුන්සිලයේ අනෙකුත් නිත්‍ය සාමාජිකයන්ගෙන් වෙන්වී තනි තීරණයක් ගනිමින් ඉරානයට එරෙහිව මෙලෙස සම්බාධක පැනවීමට ඇමෙරිකාව පියවර ගෙන තිබේ.
 
කෙසේ නමුත් ඉරානය මෙන්ම ජාත්‍යන්තර ප්‍රජාව ද ඇමෙරිකාවේ එම තීරණයට සිය විරෝධය පළ කර ඇත. එලෙස ඉරානයට එරෙහිව එක්සත් ජාතීන්ගේ සම්බාධක පැනවීමට කිසිදු නීතිමය පදනමක් නැති බව පවසමින් ඇමෙරිකාවේ සමීප මිත්‍ර රටවල් ද අදාළ තීරණයට විරෝධය පළ කර ඇත.
 
 ඇමෙරිකා එක්සත් ජනපදය සහ ඉරානය අතර 2015 වසරේදී අත්සන් තැබුණු ඉරාන න්‍යෂ්ටික ගිවිසුමෙන්’ පසු එක්සත් ජාතීන්ගේ සංවිධානය ඉරානයට පනවා තිබුණු සම්බාධක ලිහිල් කෙරුණි. ලෝක බලවතුන් හයදෙනෙක් එහි පාර්ශවකරුවෝ වූහ.
 
 ඇමෙරිකාවේ හිටපු ජනාධිපති බැරැක් ඔබාමාගේ ධුර කාලයේදී එම ගිවිසුමට අත්සන් තැබිණි.කෙසේ නමුත් ඉරානයට චෝදනා කරමින් මීට වසර දෙකකට පෙර ඉරාන න්‍යෂ්ටික ගිවිසුමෙන් ඇමෙරිකාව ඉවත් කරගැනීමට එරට ජනාධිපති ඩොනල්ඩ් ට්‍රම්ප් පියවර ගත්තේය.
 
 එසේ ලිහිල් කෙරුණු එක්සත් ජාතීන්ගේ සම්බාධක නැවත පනවන බවත් එම ක්‍රියාමාර්ග අනුගමනය නොකරන එක්සත් ජාතීන්ගේ සාමාජික රටවල්වල, ප්‍රතිවිපාක’වලට මුහුණ දීමට සිදුවනු ඇති බවත් ඇමෙරිකා එක්සත් ජනපදයේ රාජ්‍ය ලේකම් මයික් පොම්පෙඕ නිවේදනයක් නිකුත් කරමින් අද  (20) සඳහන් කළේය.
 
 ඉරානයට පනවා තිබෙන ආයුධ තහනමට අමතරව ඉරානය සමඟ යුරේනියම්වලින් න්‍යෂ්ටික ඉන්ධන නිෂ්පාදනය හා සම්බන්ධ වීම, බැලැස්ටික් මිසයිල අත්හදා බැලීම සහ සංවර්ධනය සහ මිසයිලවලට සහ න්‍යෂ්ටික ක්ෂේත්‍රයට අදාළ තාක්ෂණ හුවමාරු කරගැනීම යන කටයුතුවලදී ඉරානය සමඟ සම්බන්ධ වී කටයුතු කිරීම එක්සත් ජාතීන්ගේ සාමාජික රටවලට තහනම් වේ.
 
 ඒ.එෆ්.පී.රොයිටර්
 
(055)