ඇමෙරිකාවේ සී.අයි.ඒ. බුද්ධි අංශයේ නිලධාරියකු ලෙස කටයුතු කරමින්, සෞදියේ සිට ඇමෙරිකාව බලා පියාසර කරන මගී ගුවන් යානයක් පුපුරුවා හැරීමට සැලැසුම් කළ, යේමන අල් කයිඩා ඒජන්තවරයකු අල්ලා ගැනීමට ඇමෙරිකා ආරක්ෂක අංශ නිලධාරීහු පෙරේදා (8) සමත් වූහ. එම අල් කයිඩා ඒජන්තවරයා, සී.අයි.ඒ. බුද්ධි අංශ නිලධාරීන්ගේ විශ්වාසය දිනා ගෙන, සී.අයි.ඒ. නිලධාරියකු ලෙස වසර ගණනක් තිස්සේ සේවය කළ අයකු බව ද පැවැසේ. ඔහු සෞදියේ පිහිටි සී.අයි.ඒ. කාර්යාංශයට සම්බන්ධ නිලධාරියකු පමණක් නොව සෞදි බුද්ධි අංශ නිලධාරියෙක් ද වෙයි. අල් කයිඩා ඒජන්තවරයාගේ අනන්‍යතාව ආරක්ෂක හේතූන් මත මෙතෙක් අනාවරණය කර නැත. ඔහු සැලැසුම් කර ඇත්තේ යට කලිසමට යටින්, කලවාවල පුපුරන ද්‍රව්‍ය රඳවා ගනිමින් ඇමෙරිකන් ගුවන් යානයට ගොඩ වී, එය ඇමෙරිකාවට ළඟා වෙද්දී පුපුරුවා මහා විනාශයක් සිදු කිරීමට යැයි ඇමෙරිකා ආරක්ෂක අංශ පවසයි. ඔහු අල්ලා ගැනීමට හැකි වී ඇත්තේ සටන් කාමීන්ගේ පණිවුඩ හුවමාරුවකට කන් දීමෙන්  යැයිද විදෙස් පුවත් සේවා වැඩි දුරටත් වාර්තා කරයි. මීට පෙර, 2009 වසරේ නත්තල් දා මේ අයුරින්ම කලවා ප‍්‍රදේශයේ පුපුරන ද්‍රව්‍ය දවටා ගනිමින් ඇමෙරිකන් මගී ගුවන් යානයක් පුපුරුවා හැරීමට උත්සාහ කළ නයිජීරියා ජාතික තරුණයකු අල්ලා ගැනීමට ආරක්ෂක අංශ සමත් විය. 2010 වසරේදී ද ඇමෙරිකාව බලා පියාසර කරමින් තිබූ මගී ගුවන් යානයක භාණ්ඩ ප‍්‍රවාහන කුටියේ අටවා තිබූ බෝම්බයක් නිෂ්කී‍්‍රය කිරීමට ද ඇමෙරිකානු ආරක්ෂක අංශ නිලධාරීහු සමත් වූහ.