ඇෆ්ගනිස්තානයේ සතුරන්ට එරෙහිව සටන් කරන්න රජය සමඟ එක් වෙන්නැයි එරට ජනපති හමීඞ් කර්සායි පෙරේදා (4) තලේබාන් සටන්කාමීන්ගෙන් ඉල්ලීමක් කළේය.
ඇෆ්ගනිස්තානයේ ‘සතුරන්’ යැයි ජනපති කර්සායි පැවැසුවේ පාකිස්තානයටය. පාකිස්තානයත් ඇෆ්ගනිස්තානයත් අතර දේශසීමා ගැටුමක් නිර්මාණය වී ඇත. එය දෙරටේ හිතවත්කම් පළුදු කිරීමට හේතුවක් වී ඇතැයි ද පැවැසෙයි.
එම දේශසීමා ගැටුම ඇති වූයේ ඉකුත් දෙවැනිදාය. ඒ, ඇෆ්ගන් පාකිස්තාන දේශසීමාවේ වෙඩි හුවමාරුවකදී ඇෆ්ගන් සෙබළකු ජීවිතක්ෂයට පත් වූ අතර පාකිස්තාන සෙබළු දෙදෙනෙක් තුවාල ලැබූහ.
මෑත කාලයේ පාකිස්තානයත් ඇෆ්ගනිස්තානයත් අතර දේශසීමා ගැටුමක් ආරම්භ වූ පළමු අවස්ථාව මෙය යැයි සැළකෙයි. ඇෆ්ගන් හමුදාව පවසන්නේ පාකිස්තාන සෙබළුන් අනවසරයෙන් තම දේශසීමාවට පැමිණි නිසා වෙඩි තැබූ බවය. දෙපිරිස අතර පැවැති වෙඩි හුවමාරුව පැය දෙකක් තිස්සේ පැවැති බව වාර්තා විය.
හටගත් මෙම දේශසීමා අර්බුදයේදී තමන්ට සහාය දෙන්නැයි ඇෆ්ගන් ජනපති එරට කි‍්‍රයාත්මක තලේබාන් සටන්කාමීන්ගෙන් ඉල්ලා සිටීම ගැන තමන් පුදුමයට පත්වන බව ඇමෙරිකාව පවසා ඇත.
තලේබාන් සටන්කාමීන් සමඟ සාම කතා පැවැත්වීමට ඇෆ්ගන් ජනපති වසර කීපයක් තිස්සේ උත්සහ ගනී. ඒ වෙනුවෙන් සාම මණ්ඩලයක් ද පිහිටුවා ඇත. ඉකුත් සතියේ එම සාම මණ්ඩලයේ ජ්‍යෙෂ්ඨයෙක් ද තලේබාන් ප‍්‍රහාරයකින් ජීවිතක්ෂයට පත්වූයේය.