මධ්‍යම ඉන්දියාවේ චතිස්ගා ප‍්‍රාන්තයේ ඉකුත් සති අන්තයේ මා ඕවාදී කැරැලිකරුවන් එල්ල කළ   ප‍්‍රහාරය සම්බන්ධයෙන් විශේෂ පරීක්ෂණයක් පැවැත් වෙන බවත්, පරීක්ෂණ කටයුතු ඉන්දීයාත‍්‍රස්ත මර්දන කාර්යංශයට පැවැරී ඇති බවත් එරට පුවත් සේවා වාර්තා කරයි.
මා ඕවාදීන් එල්ල කළ ප‍්‍රහාරයෙන් ඉන්දීය ජ්‍යෙෂ්ඨ දේශපාලනඥයෝ දෙදෙනෙක් ඇතුළු 23 දෙනෙක් ජීවිතක්ෂයට පත් වූහ. ප‍්‍රහාරයෙන් තුවාල ලැබූ ගණන 32කි.
මියගියේ කොංග‍්‍රස් පක්ෂ ප‍්‍රධානී නන්ද් කුමාර් පටිල්, ඔහුගේ පුතු දිනේෂ් සහ එම ප‍්‍රාන්තයේ හිටපු ස්වදේශ කටයුතු ඇමැතිවරයා වූ මහේන්ද්‍ර කර්මාය.
ඇමැති මහේන්ද්‍ර කර්මා 2005 වසරේදී මා ඕවාදීන්ගේ කි‍්‍රයා මැඬලීම සඳහා ත‍්‍රස්ත විරෝධී කමිටුවක් පිහිටුවීමට මූලිකත්වය දැරූ පුද්ගලයා ද වෙයි.
වනාන්තර ප‍්‍රදේශයක සැඟව සිටි මා ඕවාදීන් ඉන්දීය කොංග‍්‍රස් පක්ෂ දේශපාලනඥයන් ගමන් කළ රිය පෙළ ඉලක්ක කරගෙන ප‍්‍රහාර එල්ල කළේ බැස්ටර් පළාතේ ජිරාම් නිම්න ප‍්‍රදේශයේදීය. ආරක්ෂක නිලධාරීන් අට දෙනෙක් ද ප‍්‍රහාරයෙන් ජීවිතක්ෂයට පත්වූහ.
කැරැලිකරුවන් ඉන්දීය රජයේ බලධාරීන් හා දේශපාලනඥයන් ඉලක්ක කරගෙන නිරතුරු ප‍්‍රහාර එල්ල කරයි. බොහෝවිට මෙම ප‍්‍රහාර එල්ල වනුයේ මධ්‍යම හා නැගෙනහිර ඉන්දියාවේ වනගත හා ගම්බද ප‍්‍රදේශවලදීය.
ඉන්දියාවට අභ්‍යන්තරික වශයෙන් ඇති එකම තර්ජනය මා ඕවාදීන්ගේ ප‍්‍රචණ්ඩ කි‍්‍රයා බව සඳහන් කළ ඉන්දීය අගමැති මන්මොහන් සිං, ප‍්‍රහාරයෙන් තුවාල ලැබූවන් සඳහා අවශ්‍ය සියලූ සෞඛ්‍ය පහසුකම් ලබාදෙන ලෙස ද ප‍්‍රාන්ත බලධාරීන්ට දන්වා ඇතැයි ද වාර්තා විය.