යුද අපරාධවලට චෝදනා ලැබූ ඉස්ලාමීය නායකයකුට මරණ දඬුවම නියමවීමත් සමඟ බංග්ලාදේශයේ නගර රැසක ප‍්‍රචණ්ඩකි‍්‍රයා උත්සන්න වී ඇති බව විදෙස් වාර්තා සඳහන් කරයි.
මෙම සිදුවීම සම්බන්ධයෙන් හටගෙන ඇති විරෝධතා ප‍්‍රචණ්ඩකාරී ස්වභාවයක් ගෙන ඇත. පොලිසිය හා විරෝධතාකරුවන් අතර ඊයේ ජෙනීදා පළාතේ හටගත් ගැටුම්වලින් 16 දෙනෙක් ජීවිතක්ෂයට පත්වූහ.  උතුරුදිග බංග්ලාදේශයේ පිහිටි බොග්රා නගරයේදී විරෝධතාකරුවෝ දසදහසක් පමණ පොලිස්ථාන පහකට පහර දුන්හ. රටේ අනෙක් පළාත්වලද ආරක්ෂක අංශ සහ පොලිස් නිලධාරීන් අතර ගැටුම් හටගෙන ඇත.
ඩකා අගනුවර ඇතුළු ගැටුම් හටගෙන ඇති අනෙකුත් ප‍්‍රදේශවල ආරක්ෂාව තරකිරීම පිණිස කැරැලි මර්දන පොලිසිය හා හමුදා භටපිරිස් යොදවා ඇති බව බංග්ලාදේශ ආරක්ෂක කටයුතු අමාත්‍යාංශය පවසයි. ගැටුම් හටගත් ඉකුත් බ‍්‍රහස්පතින්දා දින සිට අද දක්වා ප‍්‍රචණ්ඩකි‍්‍රයා හේතුවෙන් මියගිය ගණන 50 දක්වා ඉහළ ගොස් ඇතැයි මාධ්‍ය වාර්තා සඳහන් කරයි.
ඩෙල්වාර් හුසේන් සයිඞ් නමැති ඉස්ලාමීය නායකයාට ඉකුත් බ‍්‍රහස්පතින්දා මරණ දඬුවම නියමකිරීමත් සමඟ මෙම ගැටුම් හටගත්තේය. ඒ 1971 බංග්ලාදේශ නිදහස් සටනේදී ස්තී‍්‍ර දුෂණ, වධහිංසා හා මිනීමැරුම් සිදුකළ බවට එල්ල වූ චෝදනාවලට වැරැදිකරුවීම හේතුවෙනි. මොහු එරට ජමාද් ඉස්ලාමීය සංවිධානය නියෝජනය කරන නායකයෙකි.