චීනයෙන් තෑගි වශයෙන් ලැබුණු පැන්ඩා වලසුන් දෙදෙනකු ආපසු චීනයට යැවීමට ෆින්ලන්ත රජය තීරණය කර ඇත. ඒ, එම පැන්ඩා වලසුන් දෙදෙනා නඩත්තු කිරීම ෆින්ලන්ත රජයට අසීරු වී ඇති බැවිනි. 

‘ලුමී’ සහ ‘පයිරී’ යන මෙම පැන්ඩා වලසුන් දෙදෙනා, ෆින්ලන්තයට තෑගි වශයෙන් ලැබුණේ 2018 වසරේදීය. ඒ, චීන ජනාධිපති ෂී ජින්පින් ෆින්ලන්තයේ නිල සංචාරයකට සමගාමීවය.

පැන්ඩා වලසුන් දෙදෙනා ‘අතාරී’ නමැති ෆින්ලන්ත සත්වෝද්‍යානයට යැවුණි. වලසුන් දෙදෙනා සත්වෝද්‍යානයට පැමිණෙන නරඹන්නන්ගේ ආකර්ශනයක් බවට පත් වුවත්, උන් නඩත්තු කිරීමට වසරකට යූරෝ මිලියන 8 කට වඩා වැඩි මුදලක් වැය වෙයි. මෙය ෆින්ලන්ත රජයට විශාල බරක් බව පැවැසෙයි. 

චීනයෙන් ලැබුණු ත්‍යාගයක් ලෙස, පැන්ඩා වලසුන් දෙදෙනා, වසර 15 ක් සත්වෝද්‍යානයේ රඳවා ගැනීමට නියමිත වුවත්, මෙම නොවැම්බරයේ පැන්ඩා වලසුන් දෙදෙනා යළි චීනයට යැවීමට බලාපොරොත්තු වන බව ෆින්ලන්ත රජය වැඩි දුරටත් පැහැදිලි කර ඇත.