වයඹදිග පාකිස්තානයේ බන්නු නුවර බන්ධනාගාරයට තලේබාන් සටන්කාමීන් පහරදේවි යැයි තමන් කල්තියා අනතුරු අඟවා තිබුණු බව එරට බුද්ධි අංශ පවසයි. පසුගිය ජනවාරි 5 වැනිදා තමන් රජයට ලිපියක් යවමින් ඒ බව දැනුම් දුන් බවත් පාකිස්තාන රජය ඒ ගැන වැඩි සැලකිල්ලක් නොදැක්වූ බව පෙනී යන බවත් බුද්ධි අංශ වැඩි දුරටත් කියා සිටියි. බුද්ධි අංශ රජයට යැවූ එම ලිපියේ පිටපතක් විදෙස් මාධ්‍ය වෙත ලැබී ඇති අතර එහි සඳහන් ව ඇත්තේ බන්නු බන්ධනාගාරය තලේබාන්වරුන්ගේ ප‍්‍රධාන ඉලක්කයක් වීමට ඉඩ ඇතැයි කියාය. බන්නු නුවර බන්ධනාගාරයට සටන්කාමීන් පහර දුන්නේ ඉකුත් ඉරිදා (15) ය. එහිදී රැඳවියෝ 400 කට ආසන්න පිරිසක් බේරී පලා ගියහ. පැනගිය එම සටන්කාමීන් අතර 2003 වසරේදී පාකිස්තානයේ හිටපු ජනපති පර්වේස් මුෂාරෆ් ඝාතනය කිරීමට තැත් කළ අඞ්නාන් රෂීඞ් නමැති තලේබාන් සටන්කාමියා ද සිටියි. තලේබාන් සටන්කාමීන් ඉතා සැලැසුම් සහගතව එම ප‍්‍රහාරය එල්ල කළේ බන්ධනාගාරයේ සිටි ඔවුන්ගේ සාමාජිකයන් බේරා ගැනීමටය. ප‍්‍රහාරය සඳහා ඔවුන් අත්බෝම්බ සහ රොකට් යොදා ගෙන තිබේ.