රුසියන් හමුදා යුක්රේන නගර ඉලක්ක කරමින් එල්ල කළ මිසයිල ප්‍රහාරය තරයේ හෙලා දකිමින්, යුක්රේන හමුදාවට නවීන පන්නයේ ගුවන් ආරක්ෂක පද්ධති කීපයක් ලබා දෙන බව ඇමෙරිකන් ජනාධිපති ජෝ බයිඩන් පවසයි.

එම ගුවන් ආරක්ෂක පද්ධති හරහා, යුක්රේන හමුදාවට, රුසියන් හමුදාවෙන් එල්ල වන මිසයිල උඩු ගුවනේදී විනාශ කළ හැකි වනු ඇත. ඊයේ (10) දිනයේ රුසියන් හමුදා යුක්රේනයේ කීව් අගනුවර ඇතුළු නගර ඉලක්ක කර ගනිමින් මිසයිල එවූ අවස්ථාවේදී, මිසයිල 24 ක් උඩු ගුවනේ දී විනාශ කිරීමට යුක්රේන හමුදාව සමත් විය. යුක්රේන හමුදාව එසේ කළේ ඔවුන් සතුව පවතින මිසයිල ආරක්ෂක පද්ධති යොදා ගනිමිනි. යුක්රේන හමුදා පවසන ආකාරයට රුසියානු හමුදා එල්ල කළ මිසයිල ගණන 84 කි.

කීව් ඇතුළු ප්‍රධාන නගරවලට එල්ල වුණු එම මිසයිල ප්‍රහාරවලින් යුක්රේන සිවිල් වැසියෝ 11 දෙනෙක් ජීවිතක්ෂයට පත්වූහ. තුවාල ලැබූ ගණන 51 කි. රුසියන් හමුදා යුක්රේනයට එරෙහිව හමුදා ක්‍රියා මාර්ගයක් අනුගමනය කිරීමෙන් පසු රුසියන් හමුදා යුක්රේනයට එල්ල කළ ප්‍රබල ප්‍රහාරයක් ලෙස මෙය සැලකෙයි.

රුසියන් හමුදා එල්ල කළ එම ප්‍රහාරය සැලවුණු සැණින් ඇමෙරිකන් ජනාධිපති ජෝ බයිඩන් සහ යුක්රේන ජනාධිපති ව්ලොදිමීර් සෙලෙන්ක්සී අතරේ දුරකතන සන්වාදයක් පැවැත්විණි. එහිදී ජනාධිපති බයිඩන් යුක්රේන ජනාධිපති සෙලෙන්ස්කී ට අවධාරණය කළේ රුසියන් ප්‍රහාරවලට මුහුණ දීමටත්, ඒවායින් ආරක්ෂාවීමටත්  යුක්රේන හමුදාවට හැකි සෑම අයුරින්ම සහාය ලබා දෙන බවය.

රුසියන් හමුදා එල්ල කළ ප්‍රහාරයෙන් මියගිය සහ තුවාල ලැබූ යුක්රේන සිවිල් වැසියන් වෙනුවෙන් සොව පළ කිරීමට ද ඇමෙරිකන් ජනාධිපති බයිඩන් අමතක නොකළේය.

රුසියන් හමුදා යුක්රේ නගර ඉලක්ක කර ගනිමින් ඊයේ (10) මිසයිල ප්‍රහාර එල්ල කළේ, රුසියාවත් යුක්රේනයේ ක්‍රිමියා අර්ධද්වීපයත් යා කරන කර්ච් පාලම බෝම්බ ප්‍රහාරයකින් හානි සිදුවී දින දෙකක් ගත වෙද්දීය. කර්ච් පාලම, යුරෝපයේ දිගම පාලම ලෙස ද සැලකෙයි. රුසියන් හමුදා දකුණු දිග යුක්රේනයට අවි ආයුධ සහ හමුදා සොල්දාදුවන් ප්‍රවාහනය සිදුවන ප්‍රධාන සැපැයුම් මාර්ගය ලෙස සැලකෙන්නේ ද මෙම කර්ච් පාලමය.

පාලමට හානි සිදුවූයේ ට්‍රක් රියක අටවන ලද පුපුරන ද්‍රව්‍ය පුපුරා යෑමෙනි. පාලමට පහර දුන්නේ යුක්රේන හමුදාව බවත්, එය ත්‍රස්ත ක්‍රියාවක් බවත් රුසියන් ජනාධිපති ව්ලැදිමීර් පුටින් ඊයේ (10) මාධ්‍ය හමුවක් පවත්වමින් චෝදනා නැගුවේය. කීව් අගනුවරට මිසයිල එල්ල වීම ආරම්භ වූයේ ඉන් අනතුරුවය.

යුක්රේනයේ ක්‍රිමියා අර්ධ ද්වීපය රුසියානු පාලනය යටතේ පවතී. රුසියන් හමුදා යුක්රේනයේ ක්‍රියාත්මක සන්නද්ධ බෙදුම්වාදීන්ගේ ද සහාය ඇතිව ක්‍රිමියා අර්ධ ද්වීපය අත්පත් කර ගත්තේ 2014 වසරේදීය.

(ඒ.එෆ්.පී.)