ඇමෙරිකා ජනාධිපති ජෝ බයිඩන් සහ පසුගිය ඇමෙරිකන් ජනාධිපතිවරණයෙන් ජයග්‍රහණය කරමින්, එම ධුරයට තේරී පත් වී සිටින ඩොනල්ඩ් ට්‍රම්ප් අතර හමුවක් හෙට (13) ධවල මන්දිරයේ දී පැවැත්වීමට නියමිතය.

ඩොනල්ඩ් ට්‍රම්ප් ධවල මන්දිරයට පැමිණ, ජනාධිපති බයිඩන් හමුවන්නේ, බයිඩන් කළ ඇරැයුමකට අනුවය. වත්මන් ජනාධිපති බයිඩන් සහ ජනාධිපති ධුරයට තේරී පත් වුණු ට්‍රම්ප් අතර හමුවක් පැවැත් වෙන බව ධවල මන්දිරය නිවේදනය කර තිබුණේ පසුගිය සති අන්තයේය. හමුව ඇමෙරිකාවේ වොෂින්ටන් අගනුවර වේලාවෙන් උදෑසන 11 ට පැවැත්වෙයි.

බයිඩන් සහ ට්‍රම්ප් අතරේ සාකච්ඡාවට ලක් වනු ඇත්තේ කුමක්දැයි ධවල මන්දිරය දැනුම් දීමක් කර නැත. කෙසේ නමුත් දෙදෙනාගේ මූලික අවධානයට ලක් වනු ඇත්තේ, සාමකාමී බලහුවමාරුව සිදුවන ආකාරය ගැනය.

නව ජනාධිපති ලෙස ට්‍රම්ප් දිවුරුම් දෙන්නේ ලබන 2025 වසරේ ජනවාරියේය. ඇමෙරිකන් මහ මැතිවරණය අතරතුරේ දී ඇමෙරිකන් කොංග්‍රස් මණ්ඩලයට නියෝජිතයන් තෝරා ගැනීම ද සිදුවිය.

මේ වනවිට නියෝජිත මන්ත්‍රී මණ්ඩලයේත්, සෙනෙට් මණ්ඩලයේත් බහුතර බලය දින ගැනීමට සමත් වී සිටින්නේ ට්‍රම්ප්ගේ රිපබ්ලිකන්වරුන්ය.