රුසියානු ප්‍රහාර හමුවේ පීඩාවට ලක්වුණු අහිංසක යුක්රේන වැසියන්ගේ රුධිරයෙන් සහ කඳුළුවලින් යුක්රේනය තෙත් වී ඇතැයි, ශුද්ධෝත්තම ෆ්‍රැන්සිස් පාප්තුමන් පවසයි.

පාප්තුමන් මෙසේ පැවැසුවේ රුසියානු ජනාධිපති ව්ලැදිමීර් පුටින්, යුක්රේනයට එරෙහිව හමුදා ක්‍රියාමාර්ගයක් ගැනීම සම්බන්ධයෙන් සිය අප්‍රසාදය පළ කරමිනි.

"රුසියන් ජනාධිපති ව්ලැදිමීර් පුටින් දිගින් දිගටම පවසන්නේ රුසියාව යුක්රේනයට එරෙහිව හමුදා ක්‍රියාමාර්ගයක් අනුගමනය කරන බවය. ඒත් ඒක වැරදියි, සිදුවන්නේ යුද්ධයක්. රුසියාව යුක්රේනයට එරෙහිව යුද ප්‍රකාශ කරනවා. රුසියන් ප්‍රහාරවලින් යුක්රේන සිවිල් වැසියන් මියයනවා පමණක් නොවෙයි. දේපොල හානි සිදුවෙනවා. ජන ජීවිතය මුළුමනින්ම අවුල් වෙලා. නගරවලට දැඩි හානි සිදුවෙලා. යුද්ධයක් යනු කාටවත් වාසියක් ගෙන දෙන්නක් නොවෙයි. කවුරු දිනුවත්, ඒ දිනුම ලැබෙන්නේ පරාජයක් සමඟයි'' යැයි ශුද්ධෝත්තම ෆ්‍රැන්සිස් පාප්තුමන් පැහැදිලි කළේය.

ගැටුම් හමුවේ යුක්රේන සරණාගතයන්ට ආරක්ෂිතව පිටවී යෑමට 'මානුෂීය කොරිඩෝවක්' සකස් කිරීමේ වැදගත්කම පාප්තුමන් දිගින් දිගටම පෙන්වා දුන්නේය. ඊට අමතරව, රුසියන් හමුදා යුක්රේනය ආක්‍රමණය කිරීම වහා නැවැත්විය යුතු බව පාප්තුමා යළිත් වරක් අවධාරණය කළේය.

(රොයිටර්)

යුක්රේන-රුසියා අර්බුදය:- වැඩිදුර තොරතුරු සඳහා මෙතැනින් පිවිසෙන්න