ඉන්දියාවේ කොල්කටා නුවර පෞද්ගලික රෝහලේ හටගත් ගින්නෙන් එහි ප‍්‍රතිකාර ලබමින් සිටි රෝගීන් 89 දෙනකු මියයෑමේ සිද්ධිය ගැන විශේෂ පරීක්ෂණයක් පවත්වා වරදකරුවන්ට දැඩි දඬුවම් පැමිණවීමට තමා බලාපොරොත්තු වන බව බටහිර බෙංගාල ප‍්‍රාන්ත මහ ඇමැතිනී මම්තා බෙනර්ජී පවසයි. ගින්න හටගත්තේ බටහිර බෙංගාලයේ කොල්කටා නුවර අම්රී නමැති පෞද්ගලික රෝහලේය. ගින්න හටගෙන ඇත්තේ ඉකුත් සිකුරාදා (9) අලූයම 3 ට පමණය. බිම් මහලෙන් ආරම්භ වූ ගින්න මහල් පහකින් සමන්විත රෝහල පුරා පැතිරෙද්දී එහි රෝගීහු 160 දෙනෙක් ප‍්‍රතිකාර ගනිමින් සිටියහ. ගින්න නිවා දැමීමට ගිනි නිවන භටයන් පැය කීපයක් ප‍්‍රමාද වී පැමිණීම ගැනත්, රෝහලේ නඩත්තු කටයුතු නිසි ලෙස සිදු වූයේදැයි  සෙවීමටත් පරීක්ෂණ කණ්ඩායම් පත්කර ඇතැයි ද මහ ඇමැතිනී බෙනර්ජී පෙරේදා (10) පැවැති මාධ්‍ය හමුවකදී කියා සිටියාය. අම්රී රෝහලේ මීට පෙර ද ගින්නක් හටගෙන ඇතැයි මාධ්‍ය වාර්තා පවසයි. ගින්නට හේතුව රෝහල නිසි ලෙස නඩත්තු නොකිරීම යැයි ඔප්පු වුවහොත් රෝහල් බලධාරීන්ට නීති මගින් කටයුතු කරන බව ද මහ ඇමැතිනිය මාධ්‍ය හමුවේදී වැඩිදුරටත් කියා සිටියාය. ගින්න පැතිර යද්දී රෝගීන් බේරා ගැනීමට රෝහලේ කාර්ය මණ්ඩලය ඉදිරිපත් නොවූ බවට මියගිය රෝගීන්ගේ ඥාතීන් කරන ප‍්‍රකාශයක් ගැන ද තම අවධානය යොමු වී ඇතැයි මහ ඇමැතිනිය ප‍්‍රකාශ කළාය. ගින්න හටගත් අවස්ථාවේදී රෝගීන් අසල පිහිටි වෙනත් රෝහලකට රැගෙන යෑමට තමන් යුහුසුළුව කටයුතු කළ බව අම්රී රෝහල් බලධාරීහු පවසති.