කුවේට් අගමැති ශීක් නසාර් මොහොම්මද් අල් අහමද් අල් සාබාට ධුරයෙන් ඉවත් වන්නැයි බලකරමින් අගමැති නිල නිවස ඉදිරිපිට පැවැත්වුණු විරෝධතා රැලියකට ආරක්ෂක අංශ පහර දීමත් සමඟ විරෝධතාකරුවෝ දහස් ගණනින් ඊයේ (17) කුවේට් පාර්ලිමේන්තුවට කඩා වැදුණහ. කුවේට් රාජ්‍යයේ විරෝධතා ආරම්භ වූයේ ද බටහිර රටවල් ‘අරාබි වසන්තය’ යනුවෙන් හඳුන්වන විරෝධතා රැල්ල ආරම්භ වූ අවස්ථාවේදීය. රජයේ මුදල් අයථා ලෙස පරිහරණය කරන බව අගමැති ශීක් නසාර්ට චෝදනා එල්ල වෙමින් පවතින අතර විරෝධතාකරුවන් එක හඬින් කියා සිටින්නේ අගමැතිවරයා ධුරයෙන් ඉවත් විය යුතු බවය. විරෝධතාකරුවන්ට නායකත්වය දෙන්නේ එරට විපක්ෂ කණ්ඩායම්ය. විරෝධතාකරුවන් දෙදහසකට ආසන්න පිරිසක් ඊයේ අගමැති නිල නිවස ඉදිරිපිටට රැස්වී අගමැතිවරයාට ධුරයෙන් ඉවත් වන්නැයි බල කරන්න වූ අතර කුවේට් රජය එම විරෝධතාකරුවන් පලවා හැරීමට කැරැලි මර්දන පොලිසියත් හමුදාවත් යෙදවීය. විරෝධතාකරුවන්ට බැටන් පොලූවලින් සහ කඳුළු ගෑස්වලින් පහර දීමට ආරක්ෂක අංශ කටයුතු කළේය. එහිදී විරෝධතාකරුවන් 20 දෙනකු පොලිස් අත්අඩංගුවට පත් වූ අතර පොලිසිය එල්ල කළ ප‍්‍රහාරවලින් පස් දෙනෙක් තුවාල ලැබූහ. විරෝධතාකරුවන් පාර්ලිමේන්තු ගොඩනැගිල්ල වට කර ඊට ඇතුළු වූයේ ඉන්පසුවය. ඇතැම් විරෝධතාකරුවෝ පාර්ලිමේන්තුව ඉදිරිපිට කඳවුරු බැඳ ගත්හ. විරෝධතාකරුවන් කියා සිටින්නේ අගමැතිවරයා පමණක් නොව පාර්ලිමේන්තුවේ තවත් ඇමැතිවරුන් 16 දෙනකුම අල්ලස් සහ දූෂණ වලට සෘජුව සම්බන්ධ බවය.