අවන්හලක සාදයකට ගොස් අත්වැරදීමකින් තම අට හැවිරිදි දියණිය එහි දමා යෑමත් සමඟ බි‍්‍රතාන්‍ය අගමැති ඬේවිඞ් කැමරන් සහ ඔහුගේ බිරිය පෙරේදා (11) රාති‍්‍රයේ ලොකු අකරතැබ්බයකට මුහුණ දුන්හ. කැමරන් යුවළ එම අකරතැබ්බයට මුහුණ දුන්නේ ඔවුන් දියණිය  නැන්සි ද සමඟ ලන්ඩන් නුවර ඩවුනිං වීදියේ පිහිටි අගමැති නිල නිවසින් පිටවී, බකින්හැම්ෂයර්හි පිටිසරබද පිහිටි ඔවුන්ගේ නිවසක නිවාඩුවකට ගොස් සිටි අවස්ථාවකදීය. ඔවුහු පෙරේදා සවස ප්ලෝව් ඉන් නමැති අවන්හලේ සාදයකට සහභාගී වූහ. දියණිය බලා ගැනීමට ආරක්ෂක නිලධාරිනියකට පැවැරී තිබුණි. සාදය නිමා වීමට ඔන්න මෙන්න කියා තිබියදී දියණිය නැන්සි වැසිකිළියට ගොස් ආපසු එද්දී තම මාපියන් සහ ආරක්ෂක නිලධාරිනිය ද අවන්හලේ නොසිටියහ. කැමරන් යුවළ ඉන් පිටව ගොස් ඇත්තේ නැන්සි ඇගේ ආරක්ෂක නිලධාරිනිය සමඟ සිටිනු ඇතැයි යන විශ්වාසයෙනි.  ආරක්ෂක නිලධාරිනිය වෙනම රියකින් පිටව ගොස් ඇත්තේ නැන්සි, කැමරන් යුවළ ගමන් කළ රියේ සිටිනවා යැයි විශ්වාස කරමින්ය. තම දියණිය හිටිහැටියේ අතුරුදන් වූ බව දැනගත් සැණින් කැමරන් යුවළ මහත් සේ කලබලයට පත් වූහ. කෙසේ නමුත් ප්ලෝව් ඉන් අවන්හලේ හිමිකාරිය ඔවුන්ට ඇමැතුමක් දී නැන්සි අවන්හලේ සිටින බව දැනුම් දුන් අවස්ථාවේ එය ඔවුන් මහත් අත්වැසිල්ලක් වූයේ යැයි මාධ්‍ය වාර්තා කරයි. ඇමැතුම ලැබුණු සැණින් දියණිය රැගෙන ඒමට අගමැති කැමරන්, ප්ලෝව් ඉන් අවන්හල බලා වහා පිටත් ව ගිය බව ද මාධ්‍ය වාර්තා වැඩි දුරටත් කියා සිටී.